Tilsyn viste manglar i arbeidet med lukt i Rådalen
Statsforvaltaren har gjennomført lukttilsyn med tre verksemder i Rådalen i august. På tilsyna fann vi at alle verksemdene hadde manglar i det systematiske arbeidet for å redusere lukt.
I juni 2023 sendte Statsforvaltaren brev til verksemdene i Rådalen knytt til handtering av lukt frå industriområdet. Brevet var ei oppfølging av klage på lukt. I brevet viste vi til forventningar om drift for å unngå klager på lukt, og at verksemdene har oversikt over luktutsleppa. Dette var ein del av bakgrunnen til tilsyna som vi gjennomførte i august. Brevet vi sendte ligg ved denne saka.
Verksemder som kan vere luktkjelde har løyve
Alle verksemdene i Rådalen som kan vere kjelde til lukt har krav i løyve etter forureiningslova. Løyva ligg ved denne saka. Vilkåra om lukt er sett for å unngå luktproblem i nærmiljøet. Likevel er det mange naboar som klager på lukt.
Fleire manglar ved det systematiske luktarbeidet
Tilsynet viste at verksemdene hadde fleire manglar i det systematiske arbeidet. Verksemdene har etablert felles rutine for å følgje opp klagene. Tilsynet viste at rutinen ikkje alltid blir fulgt og er mangelfull. Resultatet av mangelfulle rutinar og oppfølging er at ingen verksemder i tilstrekkelig grad vurderer og gjennomfører tiltak, sidan verksemdene meiner dei ikkje er kjelde til lukta det vert klaga på.
Frist 1. oktober for tilbakemelding
Alle verksemdene har 14 dagar på å gje tilbakemelding på eventuelle feil i rapportane. Dei har fått frist til 1. oktober med å gje tilbakemelding på retting av avvika.
Tilsynsrapportane ligg ved denne saka.