Innfører søknadsfrist for landbruksmidlar til investeringar
Frå i haust innfører Innovasjon Norge to årlege søknadsfristar for landbruksmidlar som skal nyttast til investeringar innan tradisjonelt landbruk i Rogaland. Dei strategiske prioriteringane for 2016 blir ført vidare.
Dette innhaldet er meir enn eitt år gammalt. Informasjonen kan derfor vere utdatert.
Det er gamalt nytt at den årlege ramma Innovasjon Norge Rogaland har til bedriftsretta prosjekt i Rogaland er for lita. For 2016 var ramma på vel 40 millionar kroner. For neste år blir ho litt større, men er framleis for lita i høve til behovet. Difor er det tradisjon i vårt fylke for å prioritere målretta. Dei strategiske føringane for 2016 blir vidareførte i 2017. Det har vært viktig for landbrukspartnarskapen i fylket å avklare dette tidlig, då Innovasjon Norge Rogaland vil løyve av 2017-ramma allereie i haust.
Det som er nytt – er at det frå i haust blir innført to søknadsfristar i året for midlar som skal nyttast innan tradisjonelt landbruk. Desse fristane er 1.oktober og 1.mars. Desse gjeld for heile fylket, og omfattar også kriterieordningane for miljøtiltak og frukt.