Beredskap

Vi lever i eit trygt og stabilt samfunn, men når samfunnet blir råka av ei stor hending eller krise, må vi ha ein plan for korleis vi skal handtere situasjonen. Vi treng planar for krisehandtering, og vi må øve på krisesituasjonar i tråd med desse planane. Alle aktørar på sentralt, regionalt og lokalt nivå har ansvar for både å planlegge og øve. 

I tillegg til å øve eigen kriseorganisasjon, har Fylkesmannen ansvar for jamleg å øve kriseleiinga i kommunane. Fylkesmannen skal dessutan vere ein pådrivar for øvingar som involverer andre regionale fagetatar, som til dømes Forsvaret. 

Beredskap er ein viktig del av samfunnsplanlegginga

Ei anna viktig oppgåve for Fylkesmannen er å sjå til at vi i samfunnsplanlegginga tek beredskapsomsyn, og at kommunane har eigne kriseplanar. 

Fylkesmannen skal koordinere den regionale atomberedskapen og medverke til at regionale og lokale etatar utviklar planar for å kunne handtere ei atomulykke. Her er det Statens strålevern som er nasjonal fagetat.

Du er også ein del av Noregs beredskap

Dersom straumen blir vekke eller du blir isolert av veret, bør du vere rusta til å klare deg sjølv i nokre dagar. Styresmaktene ber oss difor vurdere risiko og sårbarheit i eigen heim. Du bør tenke gjennom kva som kan skje, kva konsekvensar det kan få, og korleis nettopp din familie kan handtere det. Finn gjerne også ut kven som kan trenge di hjelp og korleis du kan bidra. Dei grunnleggande behova dei tre første døgna av ei krise er varme, mat, drikke, legemiddel, hygiene og tilgang til informasjon. Mange av oss har alt ein god del av det vi treng for å klare oss sjølv i nokre dagar, så det er ofte ikkje så mykje som skal til for å komme helt i mål. Her får du gode idear til kva som bør vere på plass i ditt eige beredskapslager.

Vis meir


22.05.2019

Kommunar øvde på atomberedskap

Til saman 19 kommunar i Hordaland øvde nyleg på å handtere ei atomhending i kombinasjon med ekstremvêr. Til tross for tidspress og lite informasjon frå styresmakter, handterte kommunane hendinga på ein god måte.

19.03.2019

Lærerik øvingsdag i Sogndal

Torsdag 14. mars vart det gjennomført ei øving om pågande, livstrugande vald (PLIVO) på campus i Sogndal. Øvinga var eit samarbeid mellom: fylkeskommunen i Sogn og Fjordane, nødetatane, Sogndal kommune, Sogndal vgs, Høgskulen på Vestlandet, Sogndal fotball og Fylkesmannen.

22.01.2019

Sambandstrening med kommunane

I desember trena vi på å nytte Nødnett og satellittelefon med over 40 kommunar i Sogn og Fjordane og Hordaland. Tilbakemeldinga frå kommunane er at det er nyttig med korte og jamlege treningar.