Innbyggarhøyring i Karmøy kommune: 65 prosent ønsker ikkje ei grensejustering
Det viser innbyggarhøyringa som Opinion har utført for Fylkesmannen i Rogaland. Eit fleirtal av innbyggarane på fastlandsdelen av Karmøy (65 prosent), ønsker altså ikkje ei grensejustering slik at området dei bur i blir ein del av Haugesund kommune.
Dette innhaldet er meir enn eitt år gammalt. Informasjonen kan derfor vere utdatert.
27 prosent av innbyggarane ønsker ei grensejustering. Bakgrunnen er eit oppdrag Kommunal- og moderniseringsdepartementet gav Fylkesmannen. Ønsker folk i denne delen av Karmøy å tilhøyra Haugesund eller Karmøy?
Opinion gjennomførte undersøkinga i perioden 17. juni til 20. juni.
Kor mange svarte?
Det bur rundt 9 000 innbyggarar i det aktuelle området av Karmøy kommune (fastlandsdelen).
600 personar over 18 år svarte på undersøkinga. Det blei sett kvoter per grunnkrins, basert på innbyggartalet i kvar grunnkrins. Samansettinga av utvalet i undersøkinga speglar dermed den faktiske befolkningssamansetninga i kvar grunnkrins på fastlandsdelen av Karmøy.
Det er lite som skil menn frå kvinner i svara, men undersøkinga viser at motstanden mot ei grensejustering er størst blant dei under 40 år.
Spørsmålet som blei stilt
– Ønsker du ei grensejustering av fastlandsdelen av Karmøy, slik at området du bur i blir ein del av Haugesund kommune?
- Ja
- Nei
- Veit ikkje/usikker
Slik fordelte svara seg
- Ja: 27 prosent
- Nei: 65 prosent
- Veit ikkje/usikker: 8 prosent
Rapporten frå undersøkinga er lagt ved denne nettsaka.