Naturreservat i Sunndal og Nesset – høyring av verneframlegg

Fylkesmannen har sendt på høyring og kunngjort eit framlegg om vern av skog på privat grunn etter ei ordning om frivillig vern av skog. Framlegget gjeld to naturreservat etter regelverket i naturmangfaldlova.

Formålet med høyringa er å presentere verneframlegget. Det er ønskeleg at synspunkt til eit vern også blir knytt opp til forskriftene.

Hovudformålet med vern av områda er å sikre biologisk verdfulle skogsområde som ein del av naturarven. Eit eventuelt vern som naturreservat inneber den strengaste verneforma etter naturmangfaldlova, og har som konsekvens eit forbod mot alle tiltak som kan endre naturmiljøet.

Høyringsdokument, vernekart, høyringsbrev med adresseliste finn du til høgre på denne sida. Detaljerte data om området er tilgjengelege i Naturbase.

Mardalen i Nesset kommune

Området i Mardalen, som er på 4017 dekar, ligg på nord og vestsida av elva Mardøla i Eikesdal. Eit naturreservat i Mardalsbotn inneber ei endring av vernegrensa for Eikesdalsvatnet landskapsvernområde og Sandgrovbotn–Mardalsbotn biotopvernområde. Det er vidare aktuelt at Jutneset naturreservat blir slått saman med det nye i Mardalen.

Karakteristisk for Mardalen er den varierte lauvskogen med element av trua og sjeldan natur. Her er ein velutvikla edellauvskog med styva almar og hasselskog. I andre deler av området omfatter naturverdien gråor-heggeskogen. Artsmangfaldet er usedvanlig rikt, både av lav og sopp. Ein spesiell kvalitet er haustingsskogen med styva almar som både har ein særskilt naturvitskaplig og kulturhistorisk verdi. De fleste sjeldne sopp- og lavartane er registrert i den gamle haustingsskogen.

Eit mindre område opp mot Mardalsfossen er påverke av fossesprøyt. Her er mosematter, men også gras og karplanter som er avhengige av rikelig med vatn og som representerer naturtypen fossesprøytsone.

Hisdalen i Sunndal kommune

Området Hisdalen, som er på 3 303 da, ligg ved Sunndalsfjorden og ca. 12 km nordvest for Sunndalsøra.

Naturen i Hisdalen kan karakteriserast som sjeldan og området representerer fleire naturtypar med store verdiar knytet til gammal furuskog, dels også gammal lauvskog, rik edellauvskog og kalkskog. Området er lite påverka av inngrep og kontinuiteten i gamle tre og daudt trevirke er god. Hisdalen med sin bratte bekkekløft aukar variasjonsbredda i reservatet og området har samla sett ein særlig verdi for det biologiske mangfaldet.

Området er velutvikla og med fleire sjeldne artar. Spesielt varmekrevjande artar av planter, sopp og insekt. Høgdegradienten frå Sunndalsfjorden og opp mot fjellet er med på å auke artsmangfaldet.