Har rutinar for varsling

Kartlegging

Fylkesmannen Rogaland sende 29.09.15 ut ei kartlegging av korleis kommunane i Rogaland sikrar at tilsette i skole og barnehage kjenner til opplysningsplikta til barnevernet etter § 22 i barnehagelova og § 15-3 i opplæringslova, jf. kapittel 4 i barnevernslova. Målet med kartlegginga var å medverke til tidleg innsats for barn og unge med særskilte behov, slik at dei får nødvendig og tidleg hjelp.

Undersøkinga vart send til alle kommunane i Rogaland v/kommunalsjef på barnehage- og skoleområdet. Vi fekk svar frå alle kommunane. 

Spørsmål

Spørsmåla var knytte til om kommunane har rutinar som sikrar at personalet i barnehage og skole kjenner til plikta dei har etter regelverket.

Spørsmål 1 var knytt tilom dei tilsette i kommunen er kjende med kva opplysningsplikta til barnevernet inneber. Alle kommunane svarte ja på dette spørsmålet. Dette spørsmålet kravde ikkje dokumentasjon og var eit inngangsspørsmål til resten av kartlegginga.

Spørsmål 2 handla om korleis kommunen sikrar at dei tilsette i barnehage og skole kjenner til denne plikta. 25 av 26 kommunar svarte at dei har interne og eksterne rutinar for å gjere plikta kjend. Rutinane ligg i ulike internkontrollsystem, t.d. Kvalitetslosen og Compilo. 15 av kommunane har rutinane i eit system for HMS der dei tilsette må kvittere for å ha gjort seg kjende med rutinane. I hovudsak er ansvaret for å sikre at rutinen blir kjend, lagt på styrar og rektor. Opplysningsplikta er også årleg tema på personalmøte og i leiarmøte. Nokre av kommunane har rutine for å informere om opplysningsplikta for nytilsette. 6 kommunar har også gjennomført eige tilsyn om plikta på barnehageområdet. 

Den kommunen som svarte at dei ikkje hadde rutine for å sikre at dei tilsette kjenner til opplysningsplikta, er følgd opp av Fylkesmannen. Kommunen har no sendt inn dokumentasjon som viser at rutinen er på plass.

Spørsmål 3 var knytt til om rutinen er skriftleg. Her har 21 av 26 kommunar sendt inn skriftleg rutine. Manglande skriftleggjering var i hovudsak knytt til skoleområdet. Fylkesmannen har etterspurd og fått meir dokumentasjon frå 5 kommunar.

 Dokumentasjonen viser at det er store kvalitetsforskjellar i rutinane, frå kopierte skjema frå Udir-10-2012 til gode og lokalt utvikla interne rutinar. 17 av 26 kommunar viser i tillegg til eit etablert samarbeid mellom barnehage, skole, barnevern og helse.          

Spørsmål 4 handla om korleis kommunen systematisk arbeider med temaet «Opplysningsplikt til barnevernet». Kommunane viser til ulike samarbeidsforum som personalmøte, tverrfaglege møte, foreldremøte saman med barnevernstenesta, Kvello-modellen, konsultasjonsteam, ressursteam/ tverrfagleg team, fagsamlingar, kurs for kommunale og private barnehagar og kompetansepakken «Tidleg innsats». Nokre av desse tiltaka inkluderer ikkje tilsette i skolen.

Oppsummering

Kommunane melder tilbake at dei informerer og følgjer opp opplysningsplikta. Det vart etterspurt dokumentasjon frå 5 kommunar.

Fylkesmannen si vurdering

Etter Fylkesmannen si vurdering har alle kommunane eit forsvarleg system for å sikre at dei tilsette i barnehage og skole kjenner til opplysningsplikta til barnevernet. Men rutinane kan vere sårbare då dei er avhengige av at styrar/rektor gjer jobben med å informere personalet på arbeidsplassen. Seks kommunar har gjennomført tilsyn om opplysningsplikta på barnehageområdet, og Fylkesmannen oppmodar fleire kommunar å gjennomføre slike interne tilsyn. Vidare viser vi til at alle skolar skal ha eit forsvarleg system for vurdering av om krava i opplæringslova og forskrift til lova blir oppfylte, jf. opplæringslova §13-10, og kommunane bør jamleg etterspørje opplysningsplikta i samband med internkontrollen.

Meldeplikta til barnevernet er viktig

Opplysningsplikta/meldeplikta til barnevernet er særs viktig for å sikre at barn som er i ein vanskeleg situasjon, får nødvendig hjelp. Fylkesmannen ber derfor om at kommunane regelmessig sikrar at rutinane er godt kjende av dei tilsette i barnehage og skole.