Fylkeslegen blir direktør for Statens helsetilsyn

Lehmann har vore fylkeslege og avdelingsdirektør for helse-, sosial- og barnevernsavdelinga sidan 2021, og var før dette seksjonsleiar for spesialisthelse og assisterande fylkeslege i same avdeling.

Lehmann har ein sjeldan brei bakgrunn, noko helse- og omsorgsminister Ingvild Kjerkol også la vekt på i utnemninga:

 – Det er ei glede å utnemne Sjur Lehmann som ny direktør for Helsetilsynet. Han har ein brei fagleg ståstad, og er ein trygg leiar med stort fagleg truverd. I tillegg er han ein strateg, med stor evne til å tenke nytt og langsiktig, som kan setje retning for tilsynets viktige arbeid.

Statsforvaltar Liv Signe Navarsete og assisterande statsforvaltar Gunnar O. Hæreid seier utnemninga er ei stor tillitserklæring.

– Vi er glade for at Sjur går til noko der han både vil vere til nytte for og setje krav til oss som han kjenner godt, og med eit viktig og vanskeleg samfunnsoppdrag. Han har alle føresetnader for å lukkast, seier embetsleiinga.