Nasjåvnnålasj njuolgadusá bierriji tjuovoduvvut
Stuorradigge ja rádedus mierredi njuolgadusájt ja rámmajt, majt suohkana galggi vuodon biedjat arealháldadimen. Fylkamánne dahko le huksat suohkanijt vaj várajda válldi nasjåvnnålasj berustimijt birásgáhttimin, ednambargon, varresvuodan ja sebrudaksihkarvuodan. Jus suohkanij arealháldadibme le vuossten nasjåvnnålasj berustimijda, de Fylkamánne galggá dåmadit.
Fylkamánne máhttá dåmadit vuosteldime diedádusáj jali åvdedimij baktu arealplánajda jali vuosteldit mærrádusájt tsieggimássjijn (sierraloahpemærrádusa), ma li vuossten arealpládnaj. Jus suohkan vállji ij miededit vuosteldimev, de ássje manná såbadallamij oasseválldij gaskan. Jus såbadallam ij vuorbástuvá, de suohkan máhttá gåhttjot ássjev rádjat Birásgáhttimdepartemænntaj, mij låhpalasj mærrádusáv dahka.
Fylkamánne le gujddiminstánssa
Da, ma li guoskadum suohkanij mærrádusájs hiebadimplánajn ja tsieggimplánajn, ja mærrádusájs ednamlága, doajmmaloahpelága ja ájtarimlága (odellága) milta, máhtti Fylkamánnáj gujddit. Fylkamánne aj giehtadallá gujddimássjijt ma gulluji matrihkalláhkaj, åmastimseksjåvnnåláhkaj, rahteláhkaj, dájvvasajidimláhkaj ja láhkaj suohkanij åvddåoasstema birra. Duodden Fylkamánne aj la gujddiminstánnsa ássjijn gånnå almulasjvuohta badjelválldá priváhta åbmudagájt pládna- ja tsieggimlága milta (bággolånestibme). Suohkan vuostatjin dákkár gujddimijt giehtadallá. Jus suohkan ij miededa gujddimav, de gujddim rájaduvvá Fylkamánnaj mij låhpalasj mærrádusáv dahka.