Maanavaarjelimmie

Barn og bamse
Barn og bamse (Foto: zmijak - depositphotos / FMOA (kjøpt av Depositphotos))

Maanavaarjelimmien åejvielaavenjasse lea gorredidh guktie maanah jïh noerh daerpies viehkiem jïh hoksem varke åadtjoeh  jis tsiehkiej nuelesne jielieh mah maehtieh dej healsoem jïh evtiedimmiem irhkedh. Maanavaarjelimmie edtja jeatjah gaavhtan viehkiehtidh guktie maanah jïh noerh jearsoes byjjenimmiem åadtjoeh. Dovne tjïelth jïh staate laavenjassh jïh dïedtem utnieh maanavaarjelimmie-suerkesne

Tjïelten laavenjassh

Gaajhkh tjïelth edtjieh maanavaarjelimmiedïenesjem utnedh mij dam biejjieladtje barkoem maanavaarjelimmielaaken mietie dorje. Maanavaarjelimmiedïenesje edtja viehkieråajvarimmine nïerhkedh maanese jïh fualhkan. Viehkie maahta raerie jïh bïhkedimmie årrodh, mejtie aaj jeatjah viehkieråajvarimmiejgujmie ektine. Sïejhme viehkieråajvarimmieh leah vuesiehtimmien gaavhtan maanagïertesijjie, dåarjedæjja, raerie jïh bïhkedimmie jïh viehkie hïejmesne.

Maanavaarjelimmiedïenesjen  aaj dïedte aamhtesem vaeltedh jis råajvarimmieh hïejmesne eah leah nuekies juktie maanan daerpiesvoeth gorredidh. Dellie maanavaarjelimmiedïenesje maahta akteraeresne eejhtegigujmie sijjiem foestehïejmesne jallh institusjovnesne gaavnedh akten boelhken, jallh aktene jarngesne eejhtegidie jïh maanide. Dastegh maana edtja hïejmen ålkolen bïejesovvedh bielelen eejhtegh dam luhpiehtamme, dle Fylhkemoenehtse maanavaarjelæmman jïh sosijaale aamhtesidie tjuara dam nænnoestidh, raeriestimmien mietie tjïelteste.

Fylhkenmoenehtse maanavaarjelæmman jïh sosijaale aamhtesidie

Fylhkenmoenehtse maanavaarjelæmman jïh sosijaale aamhtesidie faamoem åtna sjæjsjalimmieh vaeltedh, gaskem jeatjah aamhtesinie hoksesertiestimmien bïjre, jïh aamhtesinie tjabrehtassen bïjre noeri vööste  ietjmies dåemiedimmietsagkesigujmie. Maahta sjæjsjalimmieh, mejtie fylhkenmoenehtse dorjeme, dåapmestovlide buektedh.

Fylhkenålma vååksje jïh lea klååkemesuerkie

Fylhkenålma maanavaarjelimmiebarkoem tjïeltesne vååksje. Gaskem jeatjah dle Fylhkenålma klååkoeh gïetede maanavaarjelimmiedïenesjen aamhtesegïetedæmman, jïh sjæjsjele mejtie maanavaarjelimmiedïenesje sov barkoem dorjeme maanavaarjelimmielaaken jïh reeremelaaken mietie.

Fylhkenålma aaj klååkoesuerkie aktegsnænnoestimmide mejtie maanavaarjelimmiedïenesje maanavaarjelimmielaaken mietie nænnoste. Eeremasth sæjhta aamhtesh årrodh gusnie maanah jallh eejhtegh laejhtieh sijjieh eah dam viehkiem åadtjoeh maam vaajtelieh.

Fylhkenålma aaj vååksje  maanah maanavaarjelimmieinstitusjovnine eensi hoksem jïh hijven båehtjierdimmiem åadtjoeh. Vaaksjome edtja gïehtjedidh institusjovne maanide mojhteleslaakan båehtjerde, jïh fïerhten maanan jïjtjeraarehkevoetem ååktoe. Daate sæjhta jiehtedh maanah mah tjabrehtassem  dååjrieh aktene maanavaarjelimmieinstitusjovnesne maehtieh Fylhkenålmese klååkedh.

Vis mer