Mánáidsuodjalus

Barn og bamse
Barn og bamse (Foto: zmijak - depositphotos / FMOA (kjøpt av Depositphotos))

Mánáidsuodjalusa váldobargu lea sihkkarastit, ahte mánát ja nuorat, geat ellet dakkár dilis, mii sáhttá vahágahttit sin dearvvašvuođa ja ovdáneami, ožžot vealtameahttun veahki ja fuolaheami rievttes áigge. Mánáidsuodjalus galgá maid leat mielde sihkkarastimin buot mánáide ja nuoraide bajásšaddandili, mas sii leat oadjebasat. Sihke gielddas ja stáhtas leat mánáidsuodjalussuorggi doaimmat.

Gieldda barggut

Buot gielddain galgá leat mánáidsuodjalusbálvalus, mii ollašuhttá beaivválaš doaimmaid mánáidsuodjaluslága vuođul. Mánáidsuodjalusbálvalus galgá johttáhit veahkkedoaimmaid mánnái ja bearrašii. Veahki sáhttet fállat rávvemin ja bagadeapmin, ja vejolaččat ovttastahttit rávvema eará veahkkedoaimmaide. Eará veahkki sáhttá maid leat mánáidgárdesadji, doarjjaolmmoš, rávven ja bagadeapmi ja doaimmat, maiguin geahpedit dili ruovttus.

Mánáidsuodjalusbálvalusa ovddasvástádus lea maid mannat gaskii, jos ruovttus lágiduvvon doaimmat eai veahket, nu ahte mánáid dárbbut váldojuvvošedje vuhtii. Mánáidsuodjalusbálvalus sáhttá dalle ovttasráđiid váhnemiiguin gaskkustit muhtin áigái saji biebmoruktui dahje ásahussii, dahje váhnemiid ja mánáid guovddážii. Jos máná sajuštit ruovttu olggobeallái váhnemiid dasa mieđakeahttá, de dan birra galgá mearridit Mánáidsuodjalusa ja sosiála áššiid fylkkalávdegottis gieldda árvalusa vuođul.

Mánáidsuodjalusa ja sosiála áššiid fylkkalávdegoddi

Mánáidsuodjalusa ja sosiála áššiid fylkkalávdegottis lea váldi dahkat mearrádusaid earret eará áššiin, main lea sáhka mánáid fuolaheami badjelasas váldimiin ja sosiála áššiin, mat gusket bággodoaimmaide dakkár nuoraid guovdu, geain leat duođalaš láhttenváttisvuođat. Fylkkalávdegotti dahkan mearrádusaid sáhttá ovddidit duopmostuoluide.

Fylkkamánni goziha ja lea váidalaninstánsa

Fylkkamánni goziha gieldda mánáidsuodjalusdoaimma. Dat mielddisbuktá, ahte Fylkkamánni meannuda váidalusaid, mat gusket mánáidsuodjalusa áššemeannudeapmái, ja meroštallá leago mánáidsuodjalusbálvalus ollašuhttán barggus mánáidsuodjaluslága ja hálddahuslága mielde.

Fylkkamánni lea maid váidalaninstánsa, gosa váidalit ovttaskas mearrádusaid, maid mánáidsuodjalusbálvalus dahká mánáidsuodjaluslága vuođul. Eanaš háviid lea sáhka áššiin, main mánát dahje váhnemat váidalit, go eai oaččo veahkkedoaimmaid, maid sii sávašedje oažžut.

Fylkkamánni goziha maid, ahte mánát geat leat mánáidsuodjalusásahusain ožžot doarvái buori fuolaheami ja ahte singuin láhttejit bures. Gozihuvvo maid, ahte mánáid váldet vuhtii ja ahte ovttaskas mánáid integritehta gudnejahttet. Dat mielddisbuktá earret eará, ahte jos mánná bággejuvvo masa nu mánáidsuodjalusásahusas, de das sáhttá váidalit Fylkkamánnii.

Vis mer