Askøy-dødsfalla: mannen fekk forsvarleg behandling
Mannen som politiet mistenker at drap mora si, og seg sjølv, fekk forsvarleg behandling i helsetenesta i forkant av hendinga. Det viser tilsynet Fylkesmannen har gjort.
Dette innhaldet er meir enn eitt år gammalt. Informasjonen kan derfor vere utdatert.
Fylkesmannen har avslutta tilsynet med mannen sin fastlege og privatklinikken der mannen fekk behandling. Vi har kome til at mannen fekk forsvarleg behandling frå fastlegen og privatklinikken i forkant av hendinga.
Mannen og mora hans vart funnen døde i heimen sin på Askøy 18. juli i år. Grunna alvoret i saka, starta Fylkesmannen tilsyn på eige initiativ med fastlegen og seinare privatklinikken. Vi innhenta journalen til mannen frå fastlegen, klinikken og Helse Bergen HF.
Slik det kjem fram i journalen frå fastlegen, fekk mannen oppfølging i tråd med gjeldande retningsliner og god praksis. Mannen var diagnostisert med kronisk utmattingssyndrom, og saka illustrerer kor krevjande det er å pålegge fastlegen eineansvar for utgreiing, diagnostisering og oppfølging av pasientar med denne tilstanden. Fastlegen vert ofte ståande aleine med ansvaret for ein alvorleg sjuk pasient.
Mannen hadde ikkje vore til behandling hos privatklinikken i år og vi har difor ikkje merknader til behandlinga han fekk frå klinikken i år.