Dov dïedte jearsoeslaakan vuejedh
Jis jueriedisnie mejtie maahtah jearsoeslaakan vuejedh healsoen jallh bådtjan gaavhtan, dle dïedtem åtnah dåakteren luvnie mïnnedh. Jis akte dåaktere, psykologe jallh tjelmiedåaktere veanhta healsoen gaavhtan dle datne ih maehtieh vuejemeleahpam utnedh, dle dïhte edtja dan bïjre Fylhkenålmese bieljelidh. Fylhkenålma pollisem beavna dastegh datne byörh vuejemeleahpam ellies jallh bodtetjem laehpedh.
Maahtah syökedh vuejemeleahpam bååstede åadtjodh
Datne maahtah pollisem jallh Fylhkenålmam ohtsedh vaalteme vuejemeleahpam bååstede åadtjodh. Maahtah vuejemeleahpam bååstede åadtjodh jis healsoekrïevenasside vihth illeme.
Maahtah dispensasjovnen bïjre syökedh healsoekrïevenassijste
Datne maahtah Fylhkenålmam dispensasjovnen bïjre syökedh healsoekrïevenassijste. Ohtsemisnie tjoerh bieljelidh man vuejemeleahpaklaassen bïjre datne syökh, jïh mannasinie datne vuejemeleahpam daarpesjh.
Persovneles tjaaleme ohtseme tjuara baalte bïejesovvedh:
- Staten vegvesen'en goere NA-0202 - Helseattest ved søknad om førerett - dievhteme datneste jïh dov vihties dåakteristie
- Dåakterevihtienasse sjyöhtehke sjïeredåakteristie jallh sjïeregoevtesistie mij ellies bïevnesh dov skïemtjelassen bïjre vadta, jïh gusnie akte tjïelke juvnehtimmie sjïeredåakteristie
- Jis sohkerejaamedhgæbjam åtnah jïh insulinem jallh bådtjah åadtjoeh mah vïrresohkerem vueliedieh, tjoerh Statens vegvesen'en goere NA-0202 b - Tilleggsattest om helse for diabetikere baalte bïejedh
- Jis nåakebelaakan vuajna bielelen naan skïemtjelasse, tjoerh Statens vegvesen'en goere NA-0202 optiker - Optikerattest ved søknad om førerett, baalte bïejedh
Jis datne ohtsemem hijvenlaakan vihtiestamme dle aelhkebe Fylhkenålmese reaktoe nænnoestimmiem darjodh, jïh dov aamhtesem varke gïetedidh.
Fylhkneålma ohtsemh dispensasjovnen jïh bååstededeellemen bïjre vuejemeleahpeste gïetede, mearan Healsoedirektovraate lea klååkemesuerkie. Jis dov giehpiedamme svïhtjemevoete mij ij sïjhth jorkesidh båetijen aejkien, dle Statens vegvesen dov ohtsemem gïetede.