Ekologeles laanteburrie

Ekologeles laanteburrie internasjovnale prinsihpine bigkie, healsoen, ekologijen, reaktavoeten jïh vååregevoeten sisnjelen. Daennie såarhts laanteburresne edtja voenges jïh orrestimmeles vierhtieh nåhtadidh fïerhtene gaertienisnie, biologeles gellievoetem jïh jeereldihkie kultuvreeatnemem gorredidh jïh reeredh.

Ekologeles laanteburresne edtja eatnemen gïrtelimmiem jïh ektiedahkoem krööhkedh. Vuesiehtimmien gaavhtan dle ij edtjh kunstgjødsel jallh syntetiske sjædtoevaarjelimmievierhtieh nåhtadidh. Njoelkedassh gaertjiedieh man gellie kreekh mah maehtieh årrodh aktene vihties dajvesne. Nöörjesne dle Debio mij gïehtjede jïh jååhkesje dam ekologeles laanteburriedorjemassem.

Politihkeles ulmie lea 15 prosenth ekologeles

Reerenassen ulmien mietie dle 15 prosenth beapmoedorjemasseste jïh beapmoeåtnoste edtjieh ekologeles årrodh 2020. Utnijh Nöörjesne eah maehtieh dan jïjnjh ekologeles vaaroeh åestedh goh utnijh jïjnjh jeatjah laantine. Seamma tïjjen goh reerenasse sæjhta edtja aelhkebe sjïdtedh ekologeles vaaroeh åestedh, dle sijhtieh byögkelesvoete edtja åvtene vaedtsedh jïh byjresevietseles vaaroeh veeljedh, jïh vaaroeh mah lea dorjesovveme jolle etihkeles jïh sosijaale standardi mietie. Fylhkenålmah edtjieh daam barkoem dåarjedidh.

Fylhkenålma edtja reerenassen barkosne ekologeles beapmoedorjemassen bïjre viehkiehtidh, viehkine darjojeviermiem eevtjedh jïh råajvarimmieh evtiedidh jïh tjïrrehtidh fïerhten fylhken dahkoesoejkesjinie. Daah vïjhte regijovnh leah ekologeles åvtehkefylhkh ovmessie barkoesuerkide:

  • Østfold, Oslo jïh Akershus leah tjåenghkies åvtehkefylhke ekologeles åtnose.
  • Buskerud lea åvtehkefylhke jåartadaajrose jïh jåartakultuvrese.
  • Vestfold lea åvtehkefylhke ekologeles kruanesaatedorjemassese.
  • Hordalaante jïh Sogn jïh Fjordane leah tjåenghkies åvtehkefylhke ekologeles muerjiedorjemassese.
  • Noerhte- jïh Åarjel-Trööndelage leah tjåenghkies åvtehkefylhke ekologeles mealhkan.

Fylhkenålmaj lea dïedte darjodh jïh tjïrrehtidh dahkoesoejkesjidie ekologeles laantebårran fylhkine. Dah edtjieh aaj barkoem iktedidh jïh vierhtieh joekedidh vihties råajvarimmide jïjtse fyhkesne.

Vis mer


Lenker