Separasjovne jïh juakadimmie

Separasjovne

Paarrebielieh mah eah sïjhth ektiejieledem jåerhkedh, maehtieh separasjovnen bïjre syökedh. Ohtseme separasjovnen bïjre edtja Fylhkenålmese seedtesovvedh dennie fylhkesne gusnie dijjieh minngemes aejkien ektesne årroejidh. Jis gåabpatjahkh daehtie fylhkeste jåhteme, edtjede ohtsemem Fylhkenålmese seedtedh dennie fylhkesne gusnie akte dijjeste daelie orre. Jis dijjieh maanah ektesne utnede nuelelen 16 jaepien båeries, tjoerede aktem vihtiestimmiem deanahtimmien bïjre buektedh mij ij leah båarasåbpoe goh 6 askh. Dijjieh separasjovneluhpiem Fylhkenålmeste åadtjode.

Juakadimmie

Gosse akte jaepie vaaseme mænngan dijjieh separasjovneluhpiem åadtjoejidh, dle fïereguhte dotneste maahta juakadimmiem krïevedh. Jis ajve akte dijjeste juakadimmiem sæjhta, dle dïhte maahta krïevedh juakadimmiem åadtjodh, jalhts dïhte mubpie ij dam sïjhth.

Fïereguhte maahta aaj juakadimmiem krïevedh dastegh juehkelde vyöseme unnemes göökte jaepieh. Jis guejmieh sïemes dah sinsitneste vyöseme unnemes göökte jaepieh, dle Fylhkenålma ohtsemem juakadimmien bïjre gïetede. Jis guejmieh ovgeahpan dan bïjre, dle dåapmestovle tjuara juakadimmie-aamhtesem gïetedidh.

Separasjovnem hiejhtedh

Guejmieh mah separasjovneluhpiem åådtjeme, men mah ektesne juhtieh vihth, tjuerieh bieljelimmiem seedtedh dah separasjovnem hiejhteme. Daam bieljelimmiem skaehtiekontovrese seedtede, mij dotnen sivijle staatusem jeatjahtahta.

Ohtseme jååhkesjimmien bïjre ålkoelaanten juakadimmeste jïh separasjovneste

 

Gåessie daerpies jååhkesjimmien bïjre Fylhkenålmeste syökedh?

Jis datne ålkoelaantesne juakadamme jïh edtjh vihth pruvredh, dle Fylhkenålma tjuara dam ålkoelaanten juakadimmiem jååhkesjidh. Skaehtieetaate sæjhta krïevedh daate jååhkesjimmie lea öörnegisnie jis edtja ohtsemh gïetedidh pryövemevihtienassen bïjre juktie pruvredh.

Jis datne separeradamme ålkoelaantesene, dle Fylhkenålma tjuara separasjovnem jååhkesjidh åvtelen satne maahta ohtsemem juakadimmien bïjre gïetedidh. Datne ohtsemem  Fylhkenålmese seedth dennie fylhkesne datne årroeh.

Vihtiestimmiekrievenassh

• Juakadimmie- jallh separasjovnedåapme (vihtienasse), dïhte rïektes jallh kopije, tjuara  vihtiestamme årrodh advokaateste, byögkeles dïenesjeålmeste jallh profesjovnelle kopijeradimmiesïelteste. Juakadimmietjaatsege tjuara legaliseradamme årrodh jïh aaj apostillesteempelem utnedh.
• Dastegh juakadimmie- jallh separasjovnedåapme (vihtienasse) lea aktene jeatjah gïelesne goh eengelske, tyske jallh fraanske gïelesne, akte staateautoriseradamme jarkoestæjja tjura dam jarkoestidh. Jarkoestimmie, rïektes jallh kopije, tjuara vihtiestamme årrodh aktede advokaateste, byögkeles dïenesjeålmeste jallh profesjovnelle kopijeradimmiesïelteste.

Krïevenasse akten minngemosth juakadimmie- jallh separasjovnedåapmese.

Tjuara tjaalasovveme årrodh dåapmesne jallh aktene jeatjah jååhkesjamme tjaatsegisnie dåapmestovleste, daate dåapme reaktafaamosne.

Juakadimmie jïh separasjovne aktede jeatjah noerhtelaanti laanteste

Ij edtjh Fylhkenålma separasjovnem jallh juakadimmiem jååhkesjidh jis gåabpatjahkh  lin noerhtelaanti staateårrojh, jïh adressem utnin aktene noerhtelaanti laantesne ohtsememieresne. Dellie separasjovne jallh juakadimmietjaatsege ryöktesth Skaehtieetaatese seedtesåvva, mij orre sivijlestatusem vïhtesjadta.

Fylhkenålma tjuara juakadimmim jallh separasjovnem jååhkesjidh dastegh akte dejstie guejmijste idtji veasoeh gænnah, jallh lij staateårroejinie aktene noerhtelaanti laantesne ohtsememieresne.

Dåapme ålkoelaanten dåapmestovleste hiejhtemen bïjre provrenasseste

Fylhkenålma aaj ohtsemh gïetede jååhkesjimmien bïjre hiejhteme provrenassijste. Hiejhteme sæjhta jiehtedh akte ålkoelaanten dåapmestovle ij provrenassem luhpedh. Daejnie aamhtesinie dle vihtiestimmiekrïevenassh  jïh krïevenassh  akten minngemosth  (reaktafååmijes) nænnoestimmien bïjre dah seamma goh ålkoelaanten juakadimmine.

Vis mer