Ánsomedálja addet bálkkašupmin:
- pionerabarggus dahje eará erenoamáš áŋgiruššamis, erenoamážit jos dat lea ovddidan servodaga dáin surggiin: dáidda, kultuvra, dieđa, ealáhusat, sosiála ja humanitára bargu
- erenoamáš ánssolaš guhkes áiggi bálkkáhis áŋgiruššamis servodaga ovdii jogo almmolaš dahje priváhta doaimmas, eaktodáhtolaš servviin dahje eará doaimmain, mat leat servodahkii ávkkálaččat
- erenoamáš ánssolaš guhkes áiggi barggus priváhta dahje almmolaš bálvalusas, mas áŋgiruššan lea leamaš čielgasit stuorát go dábálaš, ja mas olmmoš lea maid čájehan aktiivvalaš servodatberoštumi iežas barggu lassin
- eallináiggi áŋgiruššamis, mii lea ovdamearkan earáide
Erenoamáš dáhpáhusain sáhttet juolludit Gonagasa ánsomedálja, mii lea ráhkaduvvon gollis.
Bassi Olava árvomearka
Gonagas Oscar I ásahii Bassi Olava árvomearkka borgemánu 21. beaivve 1847 ja dan njuolggadusat rievdaduvvojedje maŋimusat ođđajagemánu 15. b. 1997. Árvomearkka juolludit bálkkašupmin ”ánssolaš barggus ruovttueatnama ja servodaga ovdii”.
Ohcamuš, mii guoská Gonagasa ánsomedálja ja Bassi Olava árvomearkka juolludeapmái, sáddejuvvo Su Majestehtii Gonagassii ja dat sáddejuvvo dan fylkka Fylkkamánni bokte, gos evttohas ássá.