Fylkkamánni ovddasvástádus lea ráhkadit ja čađahit eanandoalu guovlluguovdasaš birasprográmma (EGB), mii vuođđuduvvá nationála birasprográmmii. Birasprográmmaiguin galgá eanandoalu birasbarggu dahkat ulbmillabbon ja čalmmustahttit eanandoalu oppalaš birasáŋgiruššama. Guovlluguovdasaš birasprográmmas galgá deattastit ovttaskas guovlluguovdasaš hástalusaid.
Gielddat meannudit doarjjaohcamušaid, mat gusket nu gohčoduvvon eanandoalu erenoamáš birasdoaimmaide.
Eanandoalu birasdoaimmaid mávssolaš oassi lea fuolahit kultureanadagas, mii lea dehálaš oassi min kulturárbbis. Kultureanadat lea eanadat, masa olmmoš lea váikkuhan. Ođđasut áiggis kultureanadat lea rievdan sakka. Eanandoalu bargovuogit leat rievdan ja dálkkádat lea lieggasut, ja dat áitá ollu kultureanadagaid. Ollu šattut, divrrit ja eará organismmat šaddagohtet hárvenabbon dahje jávket oalát. Boares máđijat ja kulturmuittut vuovdiluvvet, boarrásut teknihkalaš rusttegat ja visttit, maid seađášii gáhttet, misket ja gahččet. Boares šibitnálit ja árbevirolaš šaddošlájat leat mávssolaš genavalljodagat, mat soitet jávkat.
Kultureanadaga birasárvvuid gáhtten eaktuda, ahte doalahit árbevirolaš doalu dahje johttáhit sierra suodjalandoaimmaid. Dan mii dahkat guovlluguovdasaš birasprográmmaiguin ja doarjagiiguin, maid juolludit eanandoalu erenoamáš birasdoaimmaide.
Fylkkamánnis lea ovddasvástádus dahkat šiehtadusaid eananeaiggádiiguin ja vuoigatvuođalaččaiguin eanandoalu nationála dásis válljejuvvon kultureanadagaid hárrái, ja daid doalu, dikšuma ja ođasmahttima hárrái.