Ekologalaš eanandoallu

Ekologalaš eanandoalu vuođđun leat riikkaidgaskasaš prinsihpat, mat guoskkahit dearvvašvuođa, ekologiija, vuoiggalašvuođa ja várrugasvuođa. Dakkár eanandoalus geavahit báikkálaš ja ođasmuvvi valljodagaid, mat dálus leat, ja áigumuš lea seailluhit ja hálddašit biologalaš girjáivuođa ja máŋggabealat kultureanadaga.

Ekologalaš eanandoalu vuolggasadjin lea luonddu birrajohtu ja ovttasdoaibman. Ovdamearkka dihte eai geavat koanstamuhkki eaige kemihkalaš-syntehtalaš mirkkuid. Njuolggadusat ráddjejit galle šibiha sáhttet guohtut dihto guohtunviidodagas. Norggas ekologalaš eanandoallobuvttademiid dohkkeha ja goziha Debio.

Ráđđehusa ulbmil lea, ahte 15 proseantta biebmobuvttadeamis ja biebmogolaheamis galgá leat ekologalaš 2020. Norgga geavaheddjiin eai leat ekologalaš gálvvut nu álkit olámuttus, go máŋgga eará riikka geavaheddjiin. Seammás go ráđđehus háliida oažžut ekologalaš gálvvuid álkit olámuddui, de dat sávvá, ahte almmolaš eiseválddit leat ovdamearkan ovddasvástideaddji golaheaddjin, ja válljejit dakkár gálvvuid, mat eai goarit birrasa, ja gálvvuid, mat leat buvttaduvvon alla etihkalaš ja sosiála standárddaiguin. Fylkkamánnit galget doarjut dan barggu.

Fylkkamánni galgá searvat ráđđehusa áŋgiruššamii ekologalaš biebmobuvttadeami ovdii dan láhkai, ahte dat nanne buvttadeddjiid fierpmádagaid ja ovddida ja čuovvula fylkka doaibmaplánaid. Vuolábeale vihtta guovllu ovddidit iešguđet áŋgiruššansurggiid ovddidanfylkan:

  • Østfold, Oslo ja Akershus leat ovttas ekologalaš geavaheami ovddidanfylka.
  • Buskerud lea eananmáhtu ja eanankultuvrra ovddidanfylka.
  • Vestfold lea ekologalaš ruotnasiid buvttadeami ovddidanfylka.
  • Hordaland ja Sogn ja Fjordane leat ovttas ekologalaš šattus- ja muorjebuvttadeami ovddidanfylka.
  • Davvi- ja Mátta-Trøndelag leat ovttas ekologalaš mielkki ovddidanfylka.

Fylkkamánniid ovddasvástádus lea ráhkadit ja čuovvulit fylkkaid ekologalaš eanandoalu doaibmaplánaid. Dat galgá maid bálddalastit áŋgiruššama ja juohkit doarjaga konkrehta doaimmaide iežas fylkka siste.

Vis mer