Huksenáššiid ja muddenplánaid váidaleapmi
Fylkkamánni galgá váidalaninstánsan bargat dan ovdii, ahte lágaid, láhkaásahusaid ja areálaplánaid huksenpolitihkalaš ulbmilat ollašuvvet buoremus lági mielde. Muhto fylkkamánni galgá maid deattastit gielddaid iešstivrejumi.
Gii sáhttá váidalit?
Doaimma johttáheaddji, ránnjá ja earát, geain lea váidalanvuoigatvuohta, sáhttet váidalit gieldda mearrádusaid, mat gusket huksen- ja muddenáššiide. Váidalusa galgá sáddet gildii. Jos gielda ii rievdat mearrádusas, dat sádde ášši viidáseappot Fylkkamánnii, mii mearrida ášši loahpalaččat.
Áššemeannudanáigi
Fylkkamánni galgá vuoruhit áššiid, main váidalus maŋida mearrádusa ollašuhttima. Dakkár áššiid galgá meannudit 6 vahku siste. Eará dáhpáhusain Fylkkamánni galgá vuoruhit áššiid dan mielde, man mávssolaččat dat leat olbmui ja servodahkii. Áššemeannudanáigi ii galgga leat guhkit go 3 mánu.