Kongelege besøk

Presseprogram og akkreditering

Ein viktig del av oppgåva vår er å leggja til rette for at media skal få gode arbeidsvilkår når kongefamilien kjem på besøk eller deltek på arrangement. I samråd med hoffet lagar me eit medieopplegg for journalistar og fotografar. Journalistar og redaksjonar som ønskjer å dekkja det kongelege besøket, må akkrediterast. Akkreditering skjer som regel via eit digitalt skjema (eller e-post) på Statsforvaltarens nettsider. Akkrediterte journalistar og fotografar får tilgang til eigne presseområde.

Nokre gonger er det av plassomsyn nødvendig å bruka pressepool eller fotopool. Det vil seia at nokre få av dei akkrediterte får vera til stades, mot at dei deler materialet sitt med andre akkrediterte journalistar og redaksjonar. Når me bruker pool, følgjer me Norsk Presseforbunds poolreglement.

Invitasjonar

Arrangørar som ønskjer å invitera medlemmer av kongefamilien, blir bedne om å senda invitasjonen til Statsforvaltaren i det aktuelle fylket. Dette gjeld arrangement utanfor Oslo. Statsforvaltaren formidlar invitasjonen vidare til hoffet, som saksbehandlar invitasjonen.