Endringar i smittevernlova har tredd i kraft
I den reviderte smittevernlova er det mellom anna nye krav som skal vurderast ved smitteverntiltak, ei presisering av plikta til å gi og ta i mot personleg smittevernrettleiing, og endringar i reglane om tvangsbruk.
Dette innholdet er mer enn ett år gammelt. Informasjonen kan derfor være utdatert.
Smittevernlova er den viktigaste lova som regulerer smittevernet i Noreg. Formålet med lova er mellom anna å verne befolkninga mot smittsame sjukdomar ved å førebyggje dei og motverke at dei vert overført i befolkninga, og i tillegg motverke at slike sjukdomar blir ført inn i eller ut av Noreg.
Smittevernrettleiing
I 2019 er det gjort ei omfattande revisjon av smittevernlova, som tredde i kraft 1. juli. Nokre relevante endringar er som følgjande:
- Kommunelegen skal varslast dersom ein smitta person ikkje ønskjer personleg smittevernrettleiing, og det er grunn til å tru at vedkommande heller ikkje rettar seg etter den. Kommunelegen skal då ta over den vidare smittevernrettleiinga av personen.
- Ein smitta person med allmennfarleg smittsam sjukdom har no plikt til å følgje den personlege smittevernrettleiinga gitt av diagnostiserande lege, ikkje berre ta i mot den.
Varslingsplikt for tannlegar og endringar i tvangstiltak
I den reviderte lova finn ein no at varslingsplikta også gjeld for tannlegar. I tillegg er det også fleire endringar i reglane om tvangsbruk.
- Varslande legar eller liknande skal gje informasjon til den opplysningane vedkjem, om kven som er mottakar og kva opplysningane skal brukast til. Før har det same berre gjeldt ved meldingsplikt.
- Kommunelegen og vakthavande infeksjonsmedisinske overlege ved sjukehus i helseregionen kan no treffe hastevedtak. Dette gjeld ikkje berre ved tvungen legeundersøking og innlegging til undersøking og kortvarig isolering (paragraf 5.2) som før, men òg ved tvungen isolering eventuelt behandling i sjukehus (paragraf 5.3). Smittevernnemnda har no berre sju dagar på seg for å drøfte og fatte vedtak ved tvangstiltak. Endringane løyser problema med smitteførande tuberkulosepasientar, der det har vore eit hol i lovverket tidlegare.
Førehandsundersøking av arbeids- og utdanningssøkarar
Med den reviderte lova har Helse- og omsorgsdepartementet fått utvida løyve til å gje forskrift om førehandsundersøking av arbeids- og utdanningssøkarar. Dette gjeld no òg arbeidstakarar, innleigde arbeidstakarar, skuleelevar eller studentar, og personar som skal opphalde seg i Noreg som ledd i kulturutveksling, frivillig arbeid eller liknande.
Fylkesmannen skal ha særleg merksemd mot smittevernet i fylket, ha oversikt over og kunnskap om lokale planar om smittevern og gje bistand ved behov.