Viktige grenser blir trekt opp i Hå
Hå kommune har i forslag til ny kommuneplan trekt opp langsiktig grense for landbruk rundt stasjonsbyane Nærbø, Varhaug og Vigrestad.
Dette innholdet er mer enn ett år gammelt. Informasjonen kan derfor være utdatert.
Kommuneplan for Hå 2013-2028 har vore på offentleg ettersyn, og Fylkesmannen har gitt uttale til planen.
Hovudmålet i kommuneplanen er å legge til rette for vekst i stasjonsbyane og Stokkalandsmarka, samtidig som det blir tatt omsyn til jordvern, biologisk mangfald og kulturlandskap. Hovudgrepa for å nå målet, er å trekkje opp langsiktig grense for landbruk rundt Nærbø, Varhaug og Vigrestad, og la ein vesentleg del av framtidig bustadbygging skje gjennom fortetting og ved bygging på uproduktiv jord i Stokkalandsamarka. Fylkesmannen støttar opp om dette, og gir ros til kommunen for å ta desse viktige grepa i det som er ein av landets aller viktigaste landbrukskommunar.
Fylkesmannen har motsegner til omkøyringsveg rundt Vigrestad, fire masseuttak, manglande grønstruktur i Stokkalandsmarka og føresegner til storleiken på fritidsbustader. Fylkesmannen har elles innspel til kommuneplanen sin samfunnsdel innan folkehelse, utdanning, sosial bustadbygging, samfunnsikkerheit med meir.