Løyve til skadefelling av ein jerv i Hjelmeland, Sauda, Suldal og Forsand
Fylkesmannen i Rogaland har etter søknad frå Rogaland Sau og Geit, gitt løyve til skadefelling av ein jerv i kommunane Hjelmeland, Sauda, Suldal og Forsand. Løyvet gjeld i tida frå 17. august 2017 til og med 31. august 2017. Jakta vert utført av skadefellingslaget i Rogaland.
Dette innholdet er mer enn ett år gammelt. Informasjonen kan derfor være utdatert.
Søknaden er fremma på bakgrunn av dokumentert tap av sau til jerv i Brudle i Suldal kommune. Det er også funnen døde dyr (sau) som i etterkant av søknaden har blitt stadfesta drepne av jerv i Kvanndalen\Mælen, der mange sauer er på beite. Også i Hordaland er det bekrefta tap av sau til jerv.
Jakta skal utførast av skadefellingslaget i Rogaland, og er gitt etter Naturmangfaldslova § 18 b for å avverge skade på husdyr på beite.
I 2016 var det tap av sau til jerv i same område. Fylkesmannen i Rogaland fekk søknad om erstatning for 285 lam/sau drepne av jerv i grensetraktene Rogaland, Hordaland og Telemark i 2016. Dette er eit viktig beiteområde med fleire aktive beitelag.
Heile fjellområdet er viktig beitemark for sau, og me vurderer skadepotensialet som vesentleg. Det beiter mykje sau i området, og jerven bruker å bli verande over vinteren. Ut frå at lisensjakta ikkje synes å vera tilstrekkelig effektiv, finn ikkje Fylkesmannen andre realistiske førebyggande tiltak.