Romsa sikra for allmenta

Romsaeigedomen er på tilsaman 1800 dekar fordelt på tre større øyar og nokre mindre holmar. Dei store øyane er Store-Romsa, Litle-Romsa og Tolløya. Bortsett frå to mindre hytteeigedomar sør på Tolløya, har Staten ved Direktoratet for naturforvaltning no kjøpt alle desse perlene av Statsskog.

Friluftsliv
Romsaøyane er ein del av Vestkystparken. Sjølv om mykje av arealet i dag er dekt med skog - naturleg og planta - er desse øyane rekna som eit eldorado for båtturistar. Gamle bygningar og hustufter vitnar om tidlegare slekters strev og gjer øyane til ein spanande stad for unge og vaksne. Professorhytta og Vinjehuset på Grindanes, Haukelandstunet med tilhøyrande bygningar – våningshus - løe og eldhus. Huset på Herøya og Matretunet på Litle Romsa vert brukt av ulike ideelle organisasjonar, men bruken skal ikkje vera til hinder for allmentas tilkomst og bruk av uteareal. Gamle ferdselsvegar er i dag idylliske turvegar og stiar i vakker natur.

Grillhus og brygge på Litle Romsa. Foto: Per Kristian Austbø

Friluftsrådet Vest
har ansvaret for forvaltning og tilrettelegging for friluftsfolket. Det gjeld mellom anna bryggjer og grillplassar som kan nyttast av alle som kjem til Romsa med båt. Det gjeld Grindanes (bryggje og grillhus), Naustvikjo (bryggje + gamalt naust ), Brattestøvågen (bryggje), Ørevik (bryggje), Herøya (bryggje) og Litle Romsa - Båtaviko (grillhus og bryggje).

Andre forvaltningsoppgåver
I samband med kjøpet av Romsaeigedomen har fylkesmannen fått i oppgåve å utarbeida framlegg til ny avtale om drift, skjøtsel og vedlikehald. Romsaøyane har mange natur- og kulturverdiar og forvaltningsansvaret er delt på fleire partar. Det vil difor vere behov for ein forvaltningsplan som sikrar ei god forvaltning av friluftslivsinteressene, kulturlandskapet og verneinteressene i framtida. Det skal og vurderast om det er ønskjeleg å utvida det verna arealet på Romsa. Det gjeld mellom anna ein verdfull oseanisk utforma kystfuruskog.

Meir informasjon om Romsa