Det er sikra arbeidsfolk til vårplanting i skogen i Rogaland

Sikra bemanning

400 000 – 500 000 skogsplanter ligg nå klare på kjølelager for utsetting i Rogaland. Plantene er ferskvare, så desse må nå ut i løpet av våren for å ikkje bli øydelagde. Fylkesmannen har vore i direkte kontakt med tømmeraktørane og kommunane for å få avklart status på vårplantinga, og om det er behov for mobilisera arbeidskraft. Dei har god kontroll på situasjonen i Rogaland. Aktørane saman med kommunane har vore i forkant og har allereie sikra seg ekstra bemanning lokalt, i tillegg til utanlandsk arbeidskraft som er tilgjengeleg.

Det er planlagt to plantekurs gjennom Aktivt skogbruk for Nortømmer AS for to arbeidsgjengar à fire stykk. Det er sjølvsagt nokre praktiske omsyn i desse corona-tider, men Aktivt Skogbruk har etablert nye rutinar for gjennomføring. Dette er kurs ute i friluft, noko som gjer det enklare å gjennomføra etter retningslinene for å unngå smitte. Fylkesmannen dekker kursavgifta til deltakrane gjennom Aktivt skogbruk Rogaland.