Ystaren Lise Brunborg og økomjølkbonden Kolbjørn Anda til topps!

Lise Brunborg, Stavanger ysteri, Kolbjørn Anda, Leikvoll gård og Tone Grindland, NHO. Foto: Ragnhild Espeland, IN
Lise Brunborg, Stavanger ysteri, Kolbjørn Anda, Leikvoll gård og Tone Grindland, NHO. Foto: Ragnhild Espeland, IN

Bygdeutviklingsprisen for Rogaland blei i dag tildelt Stavanger ysteri og økobonden som på tre år har skapt ei lønsam verksemd basert på kvalitetsmjølk.

Dette er rett og slett eit fantastisk eventyr om eit samspel mellom ein bonde på Randaberg og ei byjente frå Stavanger som hadde ein draum om å starte opp eigen osteproduksjon. Ut av Noregs einaste by-ysteri trillar bokstavleg talt, på sykkel, kvalitetsostar frå Stavanger ysteri. Mest profilert er osten Fønix som vi finn i kvalitetsbutikkar og restaurantar over heile Noreg.

Fag og lidenskap

Lise Brunborg heiter dama frå byen som tok utdanning innan meieriteknologi ved Norges miljø- og biovitenskaplige universitet på Ås. I 2012 var ho ferdig utdanna. Kunnskapen ho har tileigna seg delar ho flittig vekk til andre som er interesserte i foredling av mjølk. Ho representerer Matregion Rogaland på ein fortreffeleg måte. Her er det snakk om kreativitet, høg kvalitet og finesse.

Kvalitetsbevisst økomjølkbonde

Men, for å få kvalitetsost må Lise ha tilgang på kvalitetsmjølk, og det får ho av Kolbjørn Anda. Bonde med 28 mjølkekyr der halvparten av mjølka blir levert til Stavanger ysteri. Han er ein mangeårig forkjempar for betre miljø og økologisk landbruk. Ein truverdig bonde med eit stort politisk engasjement.

Kolbjørn fraktar til byen dagsfersk, upasteurisert mjølk på tanken, koplar til slangen i veggen og på den andre sida tar Lise mot mjølka i ystekaret. Her skillast det klart mellom urein og rein sone. Hygiene står i høgsetet. Det handlar om kvalitet og fingerspitzgefühl. Ekte handverksostar blir trylla fram. Fønix er allereie nemnt, men også Pan, Konrad og Snedig er populære hos kundane.

Gåve

Prisen på kr 50 000 og diplom blei utdelt av Tone Grindland, regiondirektør i NHO under årskonferansen til Greater Stavanger.

Fylkesmannen i Rogaland gratulerer og ønsker lykke til vidare!

Kontaktpersonar