Sentral forvaltning av kartdata i kommunane

Sentralisering av felles kartdatabase

Felles kartdatabase (FKB) er ei samling datasett som utgjer mykje av grunnlaget for kartfestinga av eit område; høgdekurver, bygg, infrastruktur og vatn, i tillegg til arealressursar (AR5). Data blir levert og forvalta av Geovekst, og koordinert av Kartverket. Forvaltninga av FKB skal sentraliserast, slik at data skal vere enklare å forvalte, og enno meir oppdaterte. Overgangen involverer systemleverandørane, IT-avdelinga i kommunen, og blir koordinert av kartverket. Så langt har 3 kommunar i Rogaland gått over til sentral lagring av FKBdata, og etter planen skal 11 til gå over i løpet av 2018. Norconsult er enno ikkje ferdig med si forvaltningsløysing, men elles har innføringa gått greitt i dei 3 kommunane som har gått over.

Ajourhald av AR5

Kommunane bør nytte overgangen til å gjennomgå interne rutinar for ajourhald, og slik sikre at kvaliteten på kartdata blir best mogleg. Når det gjeld kurs i ajourhald av AR5, vil det bli ei endring ved overgangen til sentral FKB. Overgang til sentral base og mangel på lokal installasjon og lisens, gjer det vanskeleg å halde samla kurs med laptop, som vi har pleidd. NIBIO ser på korleis kursing i programvare best kan løysast framover. Vi vil sette opp feltkurs for AR5 før sommaren (i juni) , sannsynlegvis i sørfylket.

Ny løysning for jordregister i februar

NIBIO jobbar og med ei ny produksjonsløype for jordregister. Dei viktigaste endringane er at berekningane i basen er dei same for både jordregister og gardskart. Løysinga vil bli tilgjengeleg i februar, og NIBIO vil sende ut meir informasjon om tidspunkt for oppdatering av arealtal i landbruksregisteret. Det blir ikkje innlesing av arealtal i Landbruksregisteret i februar i år.

Elles minner vi om at det no blir berekna ein reduksjon i godtgjersla for ajourføring av AR5, der bygg i matrikkelen blir liggande på dyrka mark grunna manglande oppdatering.