Pærebrann i Hjelmeland kommune
Funn av plantesjukdommen pærebrann i Hjelmeland sommaren 2016, har ført til restriksjonar på flytting av bikuber i kommunen.
Dette innhaldet er meir enn eitt år gammalt. Informasjonen kan derfor vere utdatert.
Sommaren 2016 vart plantesjukdommen pærebrann funne i Hjelmeland kommune. Sjukdommen skuldast ein bakterie som angrip mange ulike planteslag, blant anna epletre. Frykta er at sjukdommen skal føra til tap i fruktproduksjonen. Pærebrann er tidlegare funne i ei rekke kommunar i Rogaland, men har ikkje tidlegare vorte påvist i Hjelmeland.
Forskrift om tiltak mot pærebrann er nå endra, og Mattilsynet har sett Hjelmeland kommune på lista over kommunar i sona kor ein kjempar mot skadegjeraren.
Endringa betyr blant anna at det er forbod mot å flytta bikuber inn i, innan og ut av kommunen mellom 1. mai og 25. september. Det finnes unntak frå regelen, og Mattilsynet kan i nokre tilfelle der det ikkje er smittefare dispensera frå forbodet.
Viss det er spørsmål til dette, må Mattilsynet kontaktast.
Les meir om pærebrann på Mattilsynet sine nettsider.