Over 600 feirar norsk statsborgarskap i Kuppelhallen
210 nye statsborgarar i lag med familie og venner er klare til fest i Stavanger konserthus, Kuppelhallen laurdag 6. juni. Heile 55 nasjonar er representerte på den høgtidelege statsborgarseremonien i år.
Dette innhaldet er meir enn eitt år gammalt. Informasjonen kan derfor vere utdatert.
Målet er å ønskja velkommen og markera at nye medlemmer blir tekne opp i det norske fellesskapet. Det er frivillig å delta.
Ein festdag
Det blir ein høgtideleg seremoni med velkomst- og helsingstalar, musikalske innslag og sosialt samvær. Fylkesmann Magnhild Meltveit Kleppa er sjølvsagt til stades. Det blir helsingstalar ved Eigersund-ordførar Leif Erik Egaas, leiar av Stavanger innvandrerråd, Ryszard Kalinowskio og regiondirektør i IMDI vest, Kofi Amankwah. Hovudtalar i år er stortingsrepresentant Iselin Nybø.
19 kommunar representerte
Dei 210 nye, festklare statsborgarane kjem frå 55 ulike nasjonar, dei fleste frå Filippinene og Burma. Dei er busette i 19 kommunar i Rogaland. Og dei kjem ikkje åleine til Kuppelhallen. Med venner og familie blir det over 600 festdeltakarar i laurdag ettermiddag. Tidlegare har seremonien blitt arrangert i både rådhuset i Stavanger og Statens hus, men i år var det så mange inviterte at Kuppelhallen blir arena for aller første gong.
I alt gjekk invitasjonen ut til 1.200 personar som har blitt norske statsborgarar her i fylket det siste året - 210 av desse takka ja.
Du finn festprogrammet her.