Det er i utgangspunktet forbode å fiske etter laks
eller sjøaure med garn. Ved fiske i sjøen er det ei plikt å setje garnet
slik at det ikkje fangar laks eller sjøaure. Om ein skulle kome til å fange
anadrom laksefisk i garn tiltenkt fangst av saltvassfisk, skal fisken
sleppast ut att uansett om han er daud eller levande.
Minstemålet for laks og sjøaure er 35 cm. Det vil sei
at det er forbode å avlive laks eller sjøaure som er mindre enn 35 cm. Fisk
under minstemålet skal setjast ut att.
Fiskaravgift
Alle som har fylt 16 år og som skal fiske etter
laks og sjøaure i elvane må betale fiskaravgift til
staten.
For fiske etter laks og sjøaure i sjøen er det ikkje naudsynt å
betale fiskaravgift.
Før fisket startar må du kjøpe fiskekort eller
innhente fiskeløyve hos fiskerettshavaren. Den som sel fiskekort eller
gjev løyve til fiske, har plikt til å forvisse seg om at fiskaravgifta er
betalt.
Rapportering
Den som eig fiskerett til laks, sjøaure eller sjørøye har plikt til å
sende inn rapport om fangsten seinast ein månad etter at fisket er slutt.
Det skal rapporterast både om avliva fisk og gjenutsett fisk. Rapporteringa
skal gjerast på det sentrale registeret fangstrapp.no
Tillatte reiskap
Det er berre tillatt å fiske med stang og handsnøre.
Følgjande agn er tillatt: mark, sluk, spinner, wobbler og flue.
Det er ikkje tillatt å rykke/krøke fisk, og difor er
det innført reglar om krokstorleik. Avstanden mellom krokstamme og
krokspiss kan vere maksimalt 13 mm, og for enkeltkrok
maksimalt 15 mm.
Ved fiske frå land er det tillatt å nytte ei stang
eller eitt handsnøre pr. person. Det er tillatt med inntil 2 agn pr. stang
eller handsnøre. Det vil sei at det kan brukast to fluer på fortommen,
eller ei opphengarflue over sluken. Ved fiske frå båt er det tillatt å
bruke 2 reiskap (stang eller handsnøre) pr. båt, men berre eitt agn pr.
reiskap.
Fisketider
Fisketidene for fiske
etter anadrome laksefisk i vassdraga er regulert i eiga
forskrift.
Følgande elvar er i tillegg stengde i
2010
Fylkesmannen i Hordaland har i samråd elveeigarlaga stengt følgjande
elver for alt fiske etter anadrom fisk i 2010.
Fiskeforbodet gjeld òg i 100-metersona utanfor vassdraget. Det er tillatt å
fiske innlandsfisk i innsjøar, jf Forskrift om fiske etter innlandsfisk i
innsjøar med anadrome laksefisk.
Lokale
fiskereglar
Lov om laks- og innlandsfisk med
tilhøyrande sentrale og lokale forskrifter set dei ytre rammene for
fisket. Rettshavarane kan fastsetje eigne lokale fisketider innanfor
desse rammene.
Vi minner om at det er fiskaren sitt ansvar å setje
seg inn i dei reglane som gjeld.
Stang og handsnøre
Fiske med stang og handsnøre er tillatt heile året, men fiskinga må vere
minst 100 m frå elvemunninga i den tida det ikkje er tillatt å fiske i
vassdraget. Vi har mange små sjøaurebekkar og 100- meters forbodet gjeld
òg for desse. Det er ikkje tillatt å fiske frå båt nærmare enn 100 m frå
elvemunning.
I tillegg til dei agntypane som er tillatt i
ferskvatn, er det i sjøen òg tillatt med anna agn, som t.d. brisling
og reke.
Ved fiske frå land er det tillatt å
nytte ei stang eller eitt handsnøre pr. person. Det er tillatt med inntil
2 agn pr. stang eller handsnøre. Ved fiske frå båt er det tillatt å bruke
2 reiskap (stang eller handsnøre) pr. båt, men berre eitt agn pr.
reiskap.
Fiske med oter er i Hordaland tillatt frå 1.
september til 28. februar, med unntak av kommunane Fedje,
Austrheim, Øygarden, Fjell, Sund, Austevoll, Bømlo, Fitjar og vestkysten
av Radøy kommune frå Toska til Rossnes. Her er fiske med oter tillatt frå
5. august til 28. februar.
I Hordaland er det stengt for fiske med kilenot og
lakseverp i ordinær fiskesesong (1. juni til 4. august).
Fiske etter rømt oppdrettsfisk med kilenot og lakseverp er tillatt i
Hordaland frå 5. august til 28. februar, med unntak av Hardangerfjorden
og fjordsystemet rundt Osterøy.
I Hardangerfjorden innanfor ei linje mellom Bleiknes ved Husnes til
Ystadnes ved Ølve i Kvinnherad kommune, og i fjordsystemet rundt Osterøy
innanfor Nordhordlandsbrua er fiske med kilenot og lakseverp tillatt i
perioden 15. august til 28. februar. Dei to første vekene er det
berre tillatt å fiske frå måndag kl. 18.00 til fredag kl. 18.00. Frå 1.
september er det tillatt å fiske alle dagar.
Klikk på kartet for større visning.
I Hordaland er det stengt for fiske med krokgarn i
ordinær fiskesesong ( 1. juni til 4. august).
Fiske etter rømt oppdrettsfisk med krokgarn er tillatt i Hordaland frå 1.
september til 28. februar, med unntak av kommunane Fedje, Austrheim,
Øygarden, Fjell, Sund, Austevoll, Bømlo, Fitjar og vestkysten av Radøy
kommune frå Toska til Rossnes.
I dei nemnde kystkommunane er fiske med krokgarn tillatt frå 15.
september til 28. februar.
Klikk på kartet for større visning.
Registrering
Før fiske med kilenot, lakseverp eller krokgarn
startar må fiskaren registrere seg hos Fylkesmannen. Frist for
registering i Hordaland er ein månad før fisket tek til.
Registreringa kan gjerast på vårt registreringsskjema, sjå lenke
nedanfor, eller i Sjøfangstregisteret, sjofangst.no.
Fiske med fastståande reiskap er knytt til
grunneigarretten. Kilenot, lakseverp eller krokgarn må ikkje setjast
nærmare enn 100 m frå elvemunningane eller i fredingssonene.
Fiske med setjegarn etter rømt oppdrettsfisk er
tillatt i Hordaland frå 1. oktober til 28. februar. Maskevidda må
vere minst 58 mm.
I Sørfjorden i Hardanger innanfor ei linje frå Trones
til Kyrkjenes er det ikkje opna for fiske etter rømt oppdrettsfisk med
setjegarn.
Klikk på kartet for større visning.
Løyve til fiske med setjegarn i vinterhalvåret er
gitt fordi det er mykje rømt oppdrettsfisk i fjordane, og om vinteren
relativt lite villaks og sjøaure. Løyvet gjeld likevel ikkje i
fredingssonene utanfor vassdraga eller nærare enn 100 m frå
elvemunningane.
Alle som fiskar er pliktige til å melde inn fangst.
Ta difor kontakt med Fylkesmannen si miljøvernavdeling på epost
postmottak@fmho.no
i god tid før fisket opnar for å få tilsendt fangstdagbok. Oppgi namn,
adresse, fiskekommune og telefonnummer. Klikk på bildet under for å
bestille fangstdagbok. Fangstdagbøkene vil bli sendt ut i
september.
I perioden 1. mars - 30. september er det berre
tillatt å nytte setjegarn til fiske etter marin fisk. Alle garn som har
maskevidde over 32 mm skal senkast ned slik at heile fangstdelen står
minst 3 meter under overflata.
For Hardangerfjorden innanfor Bleiknes ved Husnes og Ystadnes ved Ølve,
og heile fjordsystemet rundt Osterøy innanfor Nordhordlandsbrua gjeld
nedsenkingskravet alle maskevidder.
Påbodet om nedsenking gjeld ikkje yrkesfiskarar som fiskar etter anna
fisk enn laksefisk.
Innanfor fredingssonene i Hordaland skal alle garn, uansett maskevidde,
senkast ned til minst 5 meter. Ingen fastståande reiskap kan
setjast nærare enn 100 meter frå elvemunningane. I nokre
fredingssoner er det heilt forbod mot garn- og/eller notfiske,
sjå kart over
fredingssoner.
Klikk på kartet for større visning.
I Hordaland er det innført fredingssoner utanfor ei
rekkje vassdrag. Vedlegg 1 i forskrifta viser kva elvar dette gjeld.
Fredingssonene er skilta.
Nokre fredingssoner har ekstra strenge reglar for
fiske med not- og garn etter marine artar. Sjå § 2 i forskrifta.
Klikk på kartet for større visning.
Før fiske startar må du kjøpe fiskekort eller
innhente løyve hos fiskerettshavaren.
Barn som ikkje har fylt 16 år har rett til gratis
fiskekort for å fiske med stang i perioden 1. januar til 20. august i dei
delar av vassdrag der det ikkje går laks eller sjøaure. I den same tida
har dei rett til gratis fiske med stang utan løyve frå grunneigar i
vassdrag der ein ikkje sel fiskekort.
Det er ingen generelle reglar om reiskap eller
fisketid for fiske etter innlandsfisk. Det er likevel ikkje tillatt å
bruke gift, sprengstoff, elektrisk straum, skytevåpen, lyster eller
liknande reiskap, eller kunstig lys. Fiske etter innlandsfisk i
Sævareidvassdraget i Hålandsdalen i Fusa kommune er regulert i eiga
forskrift.
Forbod mot fiske
av ål
Det er berre lov å fiske etter haustbare artar
i norske vassdrag, jf. innlandsfiskeforskrifta § 2. Ål er lista
som ein sterkt truga art i Norsk Rødliste, dvs. det er forbode å
fiske etter ål.
Det er forbode å bruke fisk som levande agn i Noreg.
Forbodet er for å hindre spreiing av uønska fiskeartar, og av
dyrevernmessige omsyn. Dersom du oppdagar at fiskarar brukar levande fisk
som agn, bør du melde det til Politiet eller Statens naturoppsyn.
Fiske etter innlandsfisk i elvar der det òg går opp
laks eller sjøaure føl dei same reglane som gjeld for fangst av laks
eller sjøaure. Reglar for fiske av innlandsfisk i innsjøar med anadrome
laksefisk i Hordaland er definert i eiga forskrift
(28.04.2009 Oppdatert: 17.06.2010)