Timberøyholmane naturreservat omfattar to holmar med
omliggande sjøareal, sør for Litle-Timberøy i Høydalsfjorden, og er eit
av i alt 57 sjøfuglreservat i fylket. Reservatet har særleg verdi som
hekkeplass for måsar og terner.
Forvaltningsplanen skal vere eit hjelpemiddel til å
realisere føremålet med vernet. Hovudføremålet med planen er å gi ei
oversikt over tilstand og utfordringar i Timberøyholmane naturreservat,
klargjere nærare kva spelerom grunneigarar og andre brukarar har i det
verna området, og å konkretisere nødvendige tiltak for å gi sjøfuglane
gunstige hekkeforhold. Forvaltningsplanen byggjer på
verneforskrifta og den kunnskapen som finst om verneområdet.
Ein forvaltningsplan er ikkje eit ”evigvarande”
dokument slik som sjølve verneforskrifta. Meininga med forvaltningsplanen
er at han skal reviderast (rullerast) med visse mellomrom, gjerne
10-årsintervall, slik at han til ei kvar tid skal uttrykkje det som ut i
frå tilgjengeleg kunnskap framstår som den beste måten å fremje
verneføremålet.
Delar av holmane vart rydda for skog og kratt i
januar i år, for å gjere området meir eigna som hekkeområde for sjøfugl.
Skjøtselstiltak for å halde buskar og kratt nede i framtida vil ha høg
prioritet, og slik skjøtsel er grundig omtalt i
forvaltningsplanen.
Fylkesmannen inviterer til å kome med innspel til
forvaltningsplanen. Fristen er sett til 5. juni
2009.