Stortinget har gjennom
handsaming av St.meld. nr. 62 (1991-92) ”Ny landsplan for
nasjonalparker og andre større verneområder i Norge”
(nasjonalparkmeldinga), slutta seg til at det skal utarbeidast framlegg
til verneplan for området Breheimen - Mørkridsdalen.
Miljøverndepartementet og Direktoratet for naturforvalting gav
Fylkesmannen i Sogn og Fjordane og Fylkesmannen i Oppland oppdrag om å
følgje opp nasjonalparkmeldinga ved å utarbeide framlegg til verneplan
for dette området med konsekvensutgreiing, og gjennomføre høyring.
Framlegget om vern etter naturvernlova gjeld følgjande verneområde med
tilhøyrande verneforskrifter:
-
Breheimen nasjonalpark:
ca. 1707 km2 i kommunane Skjåk og Lom i Oppland
og Luster i Sogn og Fjordane.
-
Strynefjellet
landskapsvernområde: ca.
11,8 km2 i
Skjåk kommune i Oppland.
-
Mysubytta landskapsvernområde:
ca. 5,58 km2 i Skjåk kommune i Oppland.
-
Høydalen landskapsvernområde:
ca, 11,1 km2 i Lom kommune i Oppland.
-
Mørkridsdalen landskapsvernområde:
ca. 14,3 km2 i Luster kommune i Sogn og
Fjordane.
-
Vigdalen landskapsvernområde:
ca. 29,4 km2 i Luster kommune i Sogn og
Fjordane.
-
Røykjeskålsvatnet naturreservat:
ca. 7,48 km2 i Skjåk kommune i Oppland.
-
Høyrokampen naturreservat:
ca. 9,92 km2 i Lom kommune i
Oppland.
Verneframlegget omfattar totalt ca. 1800 km2, og av
dette er ca. 28 % statleg grunn og 72 % privat grunn. I den føreslåtte
nasjonalparken er det om lag same fordeling mellom statleg og privat
grunn.
Heile Breheimen-Mørkridsdalen har uvanleg store
variasjonar i landskap og vegetasjon knytt til store skilnader i høgde
over havet og i kor mykje nedbør som fell gjennom året.
Mørkridsvassdraget omfattar alle vegetasjonssoner frå fjord til fjell.
I Breheimen – Mørkridsdalen er det òg store samanhengjande areal med
inngrepsfrie naturområde (85 % av arealet), mellom anna 343 km2 med
villmarksprega område. ”Inngrepsfrie område” er område som ligg meir
enn 1 km frå tyngre tekniske inngrep; ”villmarsprega område” ligg meir
enn 5 km unna slike inngrep. I Breheimen er det store kvartærgeologiske
verneverdiar knytt til bre- og breelvavsetningar, med stor variasjon
frå spisse toppar til store vidder, som viser ulike måtar brear og
breelvar har forma landskapet. Heilt spesielt er det at her er både
avsetningar som viser innlandsisen sine rørsler og avsetningar i istida
både mot aust og vest, og dessutan seinare brear sine avsetningar, m.a.
frå den vesle istida. Her er mange verdfulle kulturminne.
Mørkridsdalen, Mysubytta Vigdalen og Høydalen har svært verdfulle
kulturlandskap med m.a. stølsvollar. Kring Høyrokampen og Mørkridsdalen
er det eit uvanleg rikt og variert planteliv. I delar av området er det
eit spesielt dyreliv med mellom anna villrein og rovfugl. Området er
også særleg rikt på vassdragsnatur. Heile verneframlegget i
Breheimen–Mørkridsdalen utgjer eit heilskapleg naturområde,
kontrastrikt med store opplevingsverdiar, og det er mykje brukt til
friluftsliv.
Det er laga ei rekkje fagrapportar og
konsekvensutgreiingar i samband med verneplanen. Verneverdiane blir
presenterte, og konsekvensane av vern for verneverdiar og
brukarinteresser blir gjennomgått (landskap, naturmiljø, villrein,
kulturminne og kulturmiljø, friluftsliv, landbruk og tamreindrift,
reiseliv, hytter og andre bygningar, kraftressursar, motorferdsel,
samferdsel, kleberstein og lokalt tilhøyr og framtidig
forvaltning).
Verneplanen inneheld framlegg til verneformer,
vernegrenser (kart) og verneforskrifter for kvart område. Ei skisse til
forvaltningsplan er lagt ved. Planen utdjupar reglane i dei føreslåtte
verneforskriftene.
Framlegget er på høyring fram til 25. februar 2009
(10. mars 2009 for kommunane og fylkeskommunane). Det er lokal og
sentral høyring samstundes. Etter høyringa vil fylkesmennene oppsummere
innspela og sende si tilråding over til sentrale styresmakter, som legg
planen fram til endeleg avgjerd i Regjeringa.
Nærare opplysningar kan ein få hos
-
Rådgivar Tom Dybwad, tlf 57 65 51 50 (Sogn og
Fjordane)
-
Fylkesmiljøvernsjef Nils Erling Yndesdal, tlf 57
65 54 16 (Sogn og Fjordane)
-
Senioringeniør Jørn Karlsen, tlf 61 26 60 57
(Oppland)
-
Seniorrådgivar Kolbjørn Hoff, tlf 61 26 60 58
(Oppland)
-
Fylkesmiljøvernsjef Lars Eide, tlf 61 26 60 50
(Oppland)
Høyringsfråsegner sendast til
·
Fylkesmannen i Sogn og Fjordane, Njøsavegen 2, 6863
Leikanger - post@fmsf.no
eller
·
Fylkesmannen i Oppland, Serviceboks, 2626
Lillehammer.