Kort byggjetid

Samdrifta fekk klarsignal frå Innovasjon Norge om økonomisk støtte i fjor vinter, etter å ha fått rådgjeving og driftsplan frå Mjølkeprosjektet i Sogn og Fjordane og tekniske planar frå Fylkesmannen si landbruksavdeling. Dei gjekk i gang med grunnarbeidet i mai, og no ni månader seinare står det 1 850 m2 store bygget klart for innflytting i løpet av ei vekes tid. Av dei ni samdriftsfjøsa som fekk løyvt tilskot i fjor, er dette det aller største fjøset med plass til ca 80 mjølkekyr og 160 kalvar og ungdyr. Dermed kan både kyr og ungdyr frå dei 6 bruka samlast under eitt tak. Det er ikkje bygt forlager, men berre eit forrom som er integrert i fjøset. Ein baserer seg på å bruke rundballar og surfor frå eksisterande siloar. Her skal produserast mykje mjølk noko den store mjølketanken på 6 000 liter vitnar om.

 

For stort for ein robot

Med den storleiken og dei mjølkekvotane som bruka på Kyrkjeeide har, ville fort kapasiteten på ein mjølkerobot bli for liten i dette fjøset. Difor kjøpte dei heller ein stor mjølkestall der det kan mjølkast 16 kyr om gongen. Ein reknar med at det stort sett trengst to personar til mjølkinga sjølv om ein har investert i automatisk avtaking av mjølkeorgana. Golvet i den moderne mjølkestallen kan hevast og senkast hydraulisk slik at arbeidsstllinga vert best mogleg tilpassa røktarane. Fjøset er bygt med 3 liggebåsrekker for mjølkekyr og det har 2 liggebåsrekker for ungdyr. Det er ei aktuell og god løysing, dersom ein vil fore fram alle ungdyra til slakt.

 

Ein lys, triveleg og solid samdriftsfjøs

Ivar Kyrkjeeide er ein av samdriftsbøndene

 

Lyst og solid bygg

Dei mange besøkande fekk sjå eit lyst, triveleg og solid fjøs der det var høgt og luftig under taket. Det er konstruert av sjølvberande stålrammer, og veggane er av isolerte betongelement. Taket er bygt med sandwichelement. Lysrøra er senka godt ned i høve til taket slik at det blir god lyseffekt. På oppsamlingsarealet framfor mjølkestallen er det betongspaltegolv for å lette reinhaldet, men elles er det opne renner med tidsstyrte skraper på gangareala. Gjødsla vert tappa til ein stor utvendig gjødselsilo. Brukarane på Kyrkjeeide er nøgde med nybygget og ser fram til å ta det i bruk.