Førekomst av gaupe i
Jelsa-området har vore kjend i fleire år, men fram til i år har
gaupa ikkje forårsaka skade på bufe, så langt vi veit. 27. oktober
i år blei 6 lammekadaver undersøkt av Statens Naturoppsyn (SNO) på
Hamra, og 17. november blei tilsvarande 5 lam undersøkt på Storli
på Jelsa. I alle sakene blei dødsårsaka fastsett til gaupe. Begge
dei aktuelle besetningane er av rasen villsau, og saueeigarane har
etter det vi forstår ikkje høve til å sette dyra permanent i fjos
over vinteren.
Hadde dette handla om
tradisjonelt sauebruk, der besetninga blei sett inn på fjos i
vinterhalvåret, ville vår vurdering truleg blitt ein annan på
denne årstida. I dette høvet er det truleg ikkje mogleg for
saueeigarane å ta dyra inn i hus på permanent basis for
vinteren. Det er og vanskeleg å tenke seg andre effektive
førebyggande tiltak enn felling. Når det er sagt er felling av
gaupe svært krevjande, og særleg dersom det ikkje er
sporsnø.
Fellingsløyvet gjeld i Erfjord og på Jelsa i
Suldal kommune og er gitt til
Suldal Sau- og Geitalslag, som har ansvar for administrasjon av
fellinga. Det vil mellom anna seie at SSG bestemmer kven som
kan nytte fellingsløyvet.