Landbruks- og matdepartementet har øyremerka 10 millionar kroner over ein 5-årsperiode (frå 2006-2010) til gjennomføring av eit stølsprosjekt i Oppland, Hedmark og Møre og Romsdal.

Midla skal fremme støling som kulturberar, reiselivsprodukt og merkevare for å styrke næringsgrunnlag, sysselsetjing og bumiljø. Midla skal gå til tiltak for å styrke gardar med aktiv stølsdrift og for å leggje til rette for næringsutvikling i samband med støling.

11 stølsprosjekt i Oppland har fått stølsmiddel i 2009
Dei fleste prosjekta som har søkt og fått tilskott rettar seg om etablering eller vidareutvikling av mat- og reiselivstilbod på stølen. Dette gjeld eit samarbeid mellom seks budeier på Stølsvidda i Nord-Aurdal, www.stolslivet.no, vidareutvikling av gards- og stølsturismen i Valdres, www.valdres.no, utvikling av stølsutsal og ”stølsgris” på Brimi Sæter i Lom, www.brimi-seter.no, utvikling av reiselivstilbod i stølsområda i Lillehammer-regionen, utvikling av seterovernatting i Grimsdalen i Dovre og etablering av ”Barnas sætertun” i Sør-Fron med rideundervisning og rideturar i stølsområda. Det er også gjeve tilskot til ysteprosjekt på stølar i Nordre Land, Øystre Slidre og Sør-Aurdal.

Andre satsingar som har fått stølsmiddel er eit kalenderprosjekt for å få regional og nasjonal oppmerksemd kring seterkulturen og spesielt den norske budeia og eit plateprosjekt i regi av Eli Storbekken med musikk knytt til stølslivet.

Studietur til Austerrike og work-shop for forskarar
Fylkesmannen i Oppland arrangerte i 2009 saman med Valdres Natur- og Kulturpark studietur til regionen Vorarlberg i Austerrike, www.vorarlberg.at, for å lære om bygdeturisme (gards- og stølsturisme) og vidareforedling av mjølk. På turen deltok gards- og stølsturismevertskap i Valdres, Landbruks- og matdepartementet, Valdres Natur- og Kulturpark, Fylkesmannen i Oppland, Valdres Destinasjon, Valdres Næringshage og Vestre Slidre kommune.

Fylkesmannen i Oppland var også med i planlegging og gjennomføring av Bygdeforsk i Trondheim sin work-shop i Valdres i september 2009. Her vart det halde orienteringar om stølsdrift og tilleggsnæringar på stølen både frå Fylkesmannen, norske og austerrikske forskarar. Det vart også gjennomført ein studietur i stølsområda i Valdres.

Samarbeid mellom Oppland, Hedmark og Møre og Romsdal
Fylkesmannen i Oppland har teke initiativ til eit samarbeid med Hedmark og Møre og Romsdal og dei tre fylka er m.a. i gang med å lage ein stølsrettleiar saman med Oppdal kommune, Fylkesmennene i Sør-Trøndelag og Nord-Trøndelag og Norsk Seterkultur.

Målgruppene for stølsrettleiaren er stølsbrukarar og gardbrukarar som vurderer å starte opp med støling (målgruppe 1) og kommunane, fylkesmennene, landbruksrådgjevinga, mattilsynets rettleiarar, TINE, produsentlag, m.fl. (målgruppe 2). Rettleiaren blir tilgjengeleg i papirversjon og som nettutgåve. Det vil også verta laga 8 filmsnuttar (fagfilmar) og ein stemningsfilm.

Arbeidet med rettleiaren har ei kostnadsramme på kr 765.000. Oppland bidreg med kr 100.000 over BU-midlane. Rettleiaren er ferdig seinast sommaren 2010.