Fylkesmannen i Hordaland og Fylkesmannen i Sogn og
Fjordane har laga ein felles handlingsplan for økologisk landbruk for
2006 – 2009. Planen er laga i nært samarbeid med økologisk fagskule,
økologisk faglag, økologiske forsøksringar, bedrifter som ynskjer å
auke sitt sal av økologiske matvarer og økologiske pilotprosjekt i
våre to fylke. I perioden 2002 – 2005 hadde vi kvar våre
handlingsplanar, men vi finn at det er mest føremålstenleg å lage ein
felles plan for våre to fylke.
Vi har ulike utfordringar knytt til ulike produktgrupper
og deler desse i tre; grovfórbasert kjøtproduksjon, mjølk og frukt og
grønt. Hovudutfordringa i kommande planperiode vert å få til
samhandling og samarbeid gjennom heile verdikjeda og innan kvar
produktgruppe og å setje i verk tiltak mot flaskehalsane i
verdikjeda.
Det er heilt avgjerande at utøvarane i næringa sjølv
ynskjer å utvikle landbruket i økologisk lei dersom vi skal lukkast.
Dette gjeld alle ledd i verdikjeda frå produksjon, foredling og til
omsetning. Motivasjonen for å produsere økologisk står i samanheng med
økonomiske rammer for økologisk landbruk. Dette må vi jobbe for å betre
i planperioden.
Vi registrerer ei aukande interesse for økologisk
landbruk, i første omgang blant forbrukarar og hjå styresmaktene.
Butikkane sel stadig meir økologiske matvarer. Trendy ungdomsmiljø
marknadsfører økologisk mat på snowboard-konkurransar og
musikkfestivalar, og kjendiskokkar bruker økologiske matvare så
snart dei får tak i dei. Regjeringa har eit ambisiøst mål om 15 %
forbruk og produksjon av økologiske matvarer i 2015, til
samanlikning ligg vi i dag på kring 3 %. For norsk landbruk vil
det vere ei ulukke om vi i 2015 har nådd målet om 15 %
forbruk, men framleis ligg på 3 % norsk produksjon - då har auka
matimport erstatta resten. Her ligg både ei utfordring og eit
inntektspotensiale for heile landbruket - frå jord til bord.
Vi ynskjer å oppretthelde eit småskala landbruk med
eit levande kulturlandskap som ein del av ei total oppleving av mat,
natur og kultur for både fastbuande og turistar. Regelverk og
økonomiske støtteordningar i landbruket må tilpassast dei ambisiøse
måla for denne visjonen, ikkje minst ei utfordring for dei som
definerte målsetjinga om 15 %. Men det handlar også om dei mange små
steg i rett retning, og om ein tankegang basert på naturgrunnlag og tru
på at vi forvaltar noko av det gjævaste verda kan by på.
Kontaktpersonar hos Fylkesmannen i Hordaland og
Fylkesmannen i Sogn og Fjordane: