Det er fastsett ny forskrift om fiske i vassdrag med laks og aure i
Rogaland for dei neste fem åra. Av omsyn til ein truga laksestamme er
fisketidene innkorta i mange vassdrag. Dersom utviklinga i fem-årsperioden
vert negativ, må ein pårekne ytterlegare innskjerpingar.
Framlegg til nye fisketider og fiskereglar har vore på høyring frå 4.
desember 2007 til 15. januar 2008. Det er kome inn meir enn 30 skriftlege
fråsegner. I tillegg har Fylkesmannen motteke mange telefonar og andre
innspel før endeleg fastsetjing av forskrift.
Målsetjinga med fiskereglane er å sikre dei einskilde lakse- og
sjøaure-bestandane i eit langt tidsperspektiv. Samstundes skal laksen
sine leveområde forvaltast slik at naturen sitt mangfald og produktivitet
vert bevart. I samsvar med internasjonal praksis skal ei føre-var
tilnærming leggjast til grunn for lakseforvaltninga.
Dei nye fiskereglane inneber eit noko lågare fangsttrykk i mange
vassdrag. Det er likevel svært gode mulegheiter å fiske laks og sjøaure i
Rogaland dei næraste åra.