Den nye forskrifta av 15.02.2010 er eit produkt av ei lang saksutgreiing med mange aktørar. Direktoratet for naturforvaltning har gjeve retningslinene for arbeidet.

Målet med forskrifta er å redusere fangsten av villaks og sjøaure. Dette skal skje gjennom ulik avkorting av sesongen ved tidlegare stopp i fiske, nattfreding og reiskapsavgrensing.

Forskrifta inneheld same startdato 01.06., men avvik i sluttdato. Dette gjer reglane meir oversiktlege og lettare å halde seg til. Endringa med tidlegare start og stopp i fisket er tufta på røynslene frå 2003 til i dag då sesongstart var i midten av juni med stopp seint på sommaren. Forskyving av fiskesesongen fram i tid gjev bestandane tidlegare ro på seinsommaren og fram mot gyting.

Nattfreding og forbod mot markfiske gjeld i vassdrag med lakseparasitten G. salaris og er tiltak fyrst og fremst knytt til sjøaure. Begge tiltaka vil verne verdfull fisk, store som små, ved å redusere fangsteffektivitet av vaksen fisk og i tillegg vere tiltak som har positiv effekt i å spare ungfisk. Ungfisk i gyro-vassdrag er nesten eine og aleine aure.

Den nye forskrifta er å sjå på som ei ytre ramme. Elveeigarlag o.l. kan sjølve innføre sjølvpålagde restriksjonar innafor den ramma som fylkesmannen her gir.