To naturreservat – felles forvaltingsplan
Storparten av Yddal naturreservat ligg i Fusa kommune, resten i Kvam.
Geitaknottane har det meste av arealet i Kvam og Kvinnherad kommunar og ein
mindre del i Fusa. Fordi naturreservata grensar til kvarandre og har
nær identiske vernereglar, ønskjer fylkesmannen å utarbeide ein felles
plan.
Store naturkvalitetar
Yddal er verna mellom anna fordi det utgjer eit av dei siste store
naturprega barskogområda i Vest-Noreg som er lite påverka av skogsdrift i
nyare tid. Geitaknottane står og i ei særstilling, ettersom vi finn
den største førekomsten i Noreg av den trua storsalamanderen her. Denne
populasjonen er truleg også den største i verda, og dette gir oss eit
særleg stort forvaltaransvar. Geitaknottane er det første område som er
verna med føremål å sikre levestader for amfibiar i Noreg.
Framtidsretta og meir presis forvalting
Ein forvaltingsplan skal skildre generell tilstanden i reservatet,
utfordringar og mogleg trugsmål mot verneverdiane. Her er det også naturleg
å gje retningsliner for skjøtsel, eventuell tilrettelegging for ferdsel og
informasjonstiltak. Ein sentral del av forvaltingsplanen vert også å
utvikle bevaringsmål for artar og naturtypar, og etablere eit
overvakingsregime for desse. Bevaringsmåla kan til dømes gjelde mål på kor
stor bestanden av storsalamander eller andre artar bør vere.
Planen vil vera rettleiande og utfyllande i høve til dei eksisterande
vernereglane, og vil ikkje gje nye avgrensingar til grunneigarane. Det er
fylkesmannen som har forvaltingsansvaret for område verna etter
naturvernlova, og det er miljøvernavdelinga ved fylkesmannen som skal
utarbeide forvaltingsplanen.
Parti med eldre furuskog i Yddal natureservat. Foto: Magnus Johan
Steinsvåg ©. Storsalamander i leikdrakt på bilete ovanfor. Foto: Jan
Rabben ©.
Naturen skal få styre seg sjølv
Utviklinga i Yddal og Geitaknottane skal i fylgje verneforskrifta gå på
naturen sine eigne premissar. Her vil småskala endringar som skjer, slik
som rotvelter, vindfall, flaum, og eventuelle ras, vera med å skape
variasjon og nye naturlege levestadar for ulike artar. Desse dynamiske
prosessane er ein viktig del av verneverdiane. Dette gjer at områda i
størst mogleg grad skal ha eit naturleg preg, og eventuell
tilrettelegging for ferdsle må gjerast med stor varsemd.
Invitasjon til informasjonsmøte
Grunneigarar og andre interesserte vert inviterte til ope informasjonsmøte
både i Fusa og Kvinnherad om planarbeidet.
-
Dag 1: 20. april, kl 19.00 i ungdomshuset ”Breidablikk” i Sævareid.
-
Dag 2: 21. april, kl 19.00 på Hatlestrand skule.
Påmelding på e-post til
Magnus Johan Steinsvåg
eller på telefon 55 57 22 14 og 55 57 22 00.