I 2009 var det 150 elevar i grunnskulen som klaga på standpunktkarakterar i fag, i 2008 fekk Fylkesmannen inn 119 klager.

Dersom Fylkesmannen finn at det er tvil om skulane har følgt gjeldande føresegner for karaktersetning, vert klagene sendt tilbake til skulen for ny vurdering. I 2009 sende Fylkesmannen 84% av klagene i retur. Då er det rektor som set endeleg fagkarakter. Om lag 20% av elevane fekk heva karakteren gjennom ny vurdering. Dette er ein nedgang på 20% frå 2008.

Fylkesmannen sende altså fleire klager tilbake til skulen for ny vurdering i 2009, men det var færre elevane som fekk heva standpunktkarakteren.

Vi ser at det er ein del skular med mange klager, og som får klagene sendt tilbake for ny vurdering, der rektorane aldri, eller svært sjeldan, hevar karakterane. Fylkesmannen meiner det kan vera grunn til å stilla spørsmål ved om elevane ved desse skulane har reell klagerett på standpunktkarakterane. Vi ser òg at det er stor skilnad på kvaliteten på rektor si grunngjeving av den endelege karakteren.

Det er ei lita endring i fordelinga av klager på karakterskalaen. Fleire elevar med standpunktkarakterar på 1, 2 og 3 har klaga i 2009, samanlikna med 2008. Den største endringa er mellom karakterane 4 og 5. Det er langt færre elevar som klagar på karakteren 5 i 2009, men fleire klagar på karakteren 4. 50% av klagene i 2009 gjeld karakteren 4.

Faget mat og helse hadde suverent flest klager i 2008. I 2009 var det kroppsøving som toppa denne statistikken, med mat og helse som ein god nummer to. Så følgjer kunst og handverk og musikk. Nytt av året er at engelsk munnleg kjem høgt opp på denne lista, men det er framleis dei praktisk-estetiske faga som har flest klager.