Statistikken over aktiviteten i Hordalandsskogen i 2009 er no ferdigstilt. Med bakrgunn i finanskrisa og bråstoggen i finanskrisa seinhaustes 2008 var det forventa til dels stor nedgang i hogsten. Året byrja og dårleg med stogg i lokal sagbruksindustri og vanskar med å få selt tømmer. Men utover året tok aktiviteten seg opp og hogsten vart på over 90 000 kbm. Dette var ned 5000 kbm frå 2008, men det var trass alt eit toppår med den største hogsten i fylket sidan 1995. Grana held fram med å vera det klart viktigaste treslaget i fylket, det vart hogd nesten 80 000 kbm med gran, men berre drygt 10 000 kbm med furu. 

Lindås og Ullensvang på topp, Voss og Kvinnherad langt nede
Lindås, Ullensvang og Bergen stod for over halvparten av hogsten i fylket i 2009. Det er sjelden at hogsten vert så dominert av nokre få kommunar. Den tradisjonsrike skogkommunen Voss kom på fjerdeplass på lista med berre 5000 kbm og Kvinnherad som og er ein tung skogkommune hogg mindre enn 3000 kbm. Det er vanskeleg å vita kvifor det er slik, men både Voss og Kvinnherad har nok hogstmogen skog til å hogga mykje meir. Elles er det verdt å merka seg at dei årlege svingingane er veldig store, slik at plasseringane lett kan endra seg til neste år.

Kommune	Hogst (kbm)	Kommune	Hogst (kbm)
Lindås	23476	Osterøy	645
Ullensvang	17976	Odda	598
Bergen	9590	Fitjar	353
Voss	5268	Radøy	314
Tysnes	5191	Stord	294
Ulvik	4113	Fjell	245
Jondal	3856	Austevoll	219
Etne	2832	Øygarden	194
Kvinnherad	2705	Bømlo	136
Granvin	2519	Modalen	118
Os	2274	Askøy	77
Sveio	2154	Vaksdal	62
Meland	1917	Sund	23
Kvam	1594	Samnanger	14
Fusa	1360	Sum Hordaland	90117

Mykje inneståande midlar, men lågt investeringsnivå
Paradokset i skogbruket i fylket i dag er at inneståande midlar på skogfond har auka frå 7 millionar kroner i 2003 til nesten 13 millionar kroner i 2009. Samstundes er investeringsnivået mykje for lågt. Nyplantinga av gran var 740 dekar i 2009, medan ein burde ha planta 1500 dekar for å ha erstatta arealet med gran som vart hogd. Dei siste tre åra har arealet med gran i fylket sunke med 800 dekar i året, ei særs ugunstig utvikling.
Det står ikkje betre til med ungskogpleia, som har vore i nesten fritt fall siste åra og i 2009 vart det utført på berre 700 dekar. 

Ein reknar med det er trong for nærare 20 km skogsbilvegar i fylket i året framover, noko som representerer ei årleg investering på om lag 20 millionar kroner. Utbetalingane frå SKAS har dei siste åra berre vore om lag 4 millionar kroner og det står med skogeigar sin eigendel for ei investering på 6-7 millionar kroner. Underinvesteringa er med andre ord betydeleg når det gjeld skogsbilvegar og ikkje berre skogkultur.   

For meir informasjon og statistikk om skogbruket i Hordaland, sjå vedlagde årsmelding for 2009.