I samband med Opptrappingsplanen for psykisk helse har kommunane etablert mange nye tiltak og tenester. Helsedirektoratet gjorde i 2009  ei rundspørjing blant alle fylkesmannsembeta. Målet var å sjå på stoda for tenestetilbodet i kommunane etter at planen vart avslutta.

Etter avviklinga av Opptrappingsplanen får ikkje kommunane lenger øyremerka statlege midlar til psykisk helsearbeid. Trass i dette viser kartlegginga at 84 prosent av kommunane i Noreg held oppe eller styrkjer tilbodet innan psykisk helse, medan 16 prosent kuttar i tilbodet.

Fylkesmannen i Hordaland har kartlagt situasjonen her i fylket. Fleirtalet av dei 22 hordalandskommunane som svarte på undersøkinga, melde at tilbodet var uendra frå 2008 til 2009. Den viktigaste utfordringa var samarbeid og samhandling mellom einingar.  

Alle kommunane i Hordaland skal rapportere elektronisk til Fylkesmannen innen 15. februar 2010 om kva tiltak kommunen har innanfor psykisk helsearbeid.

Rapporteringa til Fylkesmannen er viktig for å følgje med på at tenestetilbodet som vart bygd opp gjennom Opptrappingsplanen, framleis vert høgt prioritert. Samstundes gir det kommunane eit verktøy for å følgje utviklinga og synleggjere årsverkinnsatsen i det psykiske helsearbeidet.